الجمعة، 29 أبريل، 2011

مصر فى مرحلة حرجة..ادخل اقرا للاخر..واحكم عقلك..وخد قرارك



on Monday, February 7, 2011 at 2:53pm



مقدمة

اولا ياجماعة انا واحد منكو مش اخوان ولا تبع حزب ولا محامى ولا ليا ايديولوجية مختلفة عنكو  انا مجرد طالب جامعى زيى زيك من طبقة متوسطة نسبيا ونفسى اشوف مصر وشعبها العظيم وهو بيتمتع بكل حقوقه واننا نقضى كلنا على كل مظاهر الفساد والقهر فى البلد مجرد شاب مصرى مسالم مش عميل للموساد ولا للاستخبارات الامريكية ولا عضو فى حزب الله
الموضوع ده نقاشى بحت وبطريقة موضوعية وهادية جدا وحاول تشغل عقلك معايا لكل شباب مصر المخلصين الواعين ومش مجرد شعارات او  كلام مكرر اسمع كلامى للاخر وخش قول رايك ومناقشاتك للنقط اللى عليها اعتراض وادينى الفرصة انى اسمع كلامك وارد عليك لكن احنا متفقين من الاول مفيش هدم تام للراى بتاعى من غير متناقشنى وانا موجود ومرحب بكل الاراء
معلش الموضوع طويل وهياخد من وقتك ممكن نص ساعة لازم تحاول تقراه للاخر مش هتخسر حاجة وتركز فيه بلدك محتاجاك ومحتاجة قرارك


الاول انت مسالتش نفسك انت بتعمل ثورة ضد ايه بالظبط

ياشباب فيه ناس مش واخدة بالها الثورة دى اعظم ثورة فى تاريخ مصر زى ماقال الاستاذ الكبير محمد حسنين هيكل ودى كمان ممكن تكون فى تاريخ الشعوب العربية كلها لانها ضد اكبر نظام ديكتاتورى وعسكرى فى المنطقة العربية اول ثورة شعبية حقيقة فى تاريخ مصر وهنيجى كمان 200 و300 سنة وهتتكتبلنا فى كتب التاريخ هنبقى اول شعب عربى وافريقى يوصل للديمقراطية الحقيقة هنعمل اللى معمولوش سعد زغلول ولا عرابى ولا مصطفى كامل من غير تقليل من جهودهم العظيمة فى تاريخ مصر
الثورة دى ياشباب مش ضد مبارك ولا ضد جمال وبس الثورة دى ضد نظام الحكم من 60 سنة النظام العكسرى الصارم اللى بيلغى او بيهمش كل الاحزاب السياسية اللى قايم على نظام الاعتقالات اى حد بيتكلم فى السياسة بيعتقلوه النظام اللى ماسك الشعب بالعافية النظام اللى بيمص فى دم الشعب
الجيش المصرى العظيم كل مهمته انه يحمى حدودنا ويدافع عن ارض مصر زى معمل ببطولتيه الكبيرة فى حرب اكتوبر لكن قادة الجيش مينفعش يحكمو الشعب واللى موجود دلوقتى نظام عسكرى صارم وامنى عنيف احنا عايزين نظام مدنى مش عسكرى ومش بنؤيد اى انقلاب عسكرى للجيش على الحكم لانه معناه استمرار نفس النظام ونفس المشكلة

المشكلة مش فى مبارك او جمال المشكلة فى تلات حاجات نظام الدولة تحت الحكم العسكرى وسيطرة الحزب الوطنى على البلد بقبضة حديدية وكمان الدستور اللى لو مبارك هو اللى اجرى التغييرات الدستورية فيه بنفسه مش هيبقى فيه اى هئية رقابية هتعرف تمنعه ولا هتحددله يغير ايه والوحيد اللى ممكن يناقشه هو مجلس الشعب اللى 90 فى المية من اعضاءه من الحزب الوطنى ولو مشى مبارك هيجى اللوا فلان اللى هيمسك مصر بنفس النظام ومص دم الشعب ومفيش اى سلطة رقابية عليه ولا على مجلس الشعب ولا على الانتخابات الدستور لازم يتغير من لجنة من السياسيين الشرفاء والمفكرين وقيادات الثورة والشعب الحقيقية
انت مش واخد بالك ان النائب دلوقتى ورئيس الوزراء من الجيش برضه عشان يستمر الجيش مسيطر على البلد


مبارك لازم يتحاكم وهقولك ليه
1
دم الشهداء
دم الشهداء فى ميدان التحرير دول مين اللى هيحاكمو عليها فى رايك لو سيبته يمشى فى شهر 9 هو مش كان ممكن لو لقى حبيب العادلى امر بالعنف مع الشعب كان يصدر قرار فورى ويوقفه ولا كان نايم ساعتها وانت فاكر حاجة زى كده عدت من غير ماهو نفسه يكون مخططلها ونفس الموضوع مع هجوم البلطجية والحرامية واتباع الحزب المخطط والمدبر بيقتل شعبه عشان ينهى المظاهرات هل انت مسامح مبارك فى دماء شهداء الشعب اللى لسه موجودة على ارض بلدك حدد قرارك
2
حكم فاسد لمدة 30 سنة
لمدة 30 سنة حكم فاسد وطغيان وهو ذل الشعب وقهره وفقره نص الشعب المصرى تحت مستوى الفقر والاقتصاد اتخرب ومصر ديونها زادت فى عصره من 12 مليار جنيه الى 32 مليار دولار فى 2010 اى 180 مليار جنيه وده المعلن وفيه بيقول انها وصلت ل 800 مليار جنيه ده غير الاعتقالات وهدم الاحزاب والانتخابات المزورة 
3
سرقة فلوس الشعب
لما تلاقى ان مبارك وعيلته ثروتهم من 40 الى 70 مليار دولار من بحث لصحيفة الجارديان وقنوات امريكية يبقى لازم تعرف انه بيسرق فلوس البلد طول ال 30 سنة دى ثروته اكبر من ثروة بيل جيتس نفسه ثروة مبارك ممكن هى اللى تكفى لسداد مصر ديونها وتعيد اقتصاد مصر من تانى انت عايز تسيبه يمشى ويخلع بفلوس البلد ويعيش بيها هو وولاده فكر بعقلك
4
التعتيم الاعلامى وجرائم الحريات فى مصر
قطع النت لمدة 5 ايام وخطوط التليفون لمدة يومين والرسائل النصية لاسبوع ونص فى كل المدن
قطع الطرق المؤدية من والى السويس ووقف طريق القاهرة الاسكندرية الصحراوى وخطوط السكك الحديدية وعدم توقف المترو فى محطات مبارك والسادات وعرابى
والتليفزيون المصرى اللى بيقوم بتعتيم كامل على كل الاخبار ومبينقلش اى صورة واقعية وكله تاييد وحفظ للنظام والامن مستتب فى كل المحافظات والتاييد متواجد فى كل المحافظات بالملايين والهبل ده وخلى الناس تفقد الثقة فى تليفزيونهم المصرى الى خلى استقالة سها النقاش فى النيل للاخبار بعد عمل لمدة 20 عاما احتجاجا على التعتيم الاعلامى الى بيتبعه التلفزيون المصرى
وهو نفسه الرئيس الذى خرجلنا فى الخطاب الثانى وقال انه بيدى الشعب كامل حرية الراى والتعبير وبيحترم كل مطالبهم
طب مين اللى هيحاسبه على كل الاجراءات الغير القانونية دى وهو الطبيعى انه مسئول عنها حتى هو اقال الوزارة القديمة والاجراءات كانت مستمرة التى بها انتهاك لحريات الراى والتعبير
5
 اعتقال الصحفيين وترهيبهم

- مراسل السى ان ان الامريكية تم الاعتداء عليه من قبل بلطجية امام المتحف المصرى ليلة الخميس وعشان كده مراسل السى ان ان فى امريكا سال جيتس المتحدث الرسمى للبيت الابيض وقاله انت رايك ان البطجية دول تبع النظام ولا لا
- كل مراسى القنوات الاوربية بما فيها البى بى سى البريطانية تم الاعتداء عليهم وترويعهم ومنع كاميراتهم من الدخول لميدان التحرير فى ليلة الخميس وده باعتراف صحفى بريطانى مش عربى فى قناة البى بى سى العربية
- ضرب واصابة مراسل البى بى سى العربية اسد الله الصاوى من الامن فى اولى ايام المظاهرات وجه على الهوا وهو راسه غرقانه فى الدم والدم منتشر على قمصيه وقال الامن صمم على ضربى رغم انه عرف انى صحفى
- ترويع منظمى حقوق الانسان المصريين واغلاق مكاتبهم القريبة من ميدان التحرير مثل مركز سوازان مبارك لحقوق الانسان
- وائل غنيم مراسل جوجل اختطف من ثالث ايام المظاهرات ولم يعثر عليه احد
- اعتقال 4 مراسيلين فرنسيين فى ثالث ايام المظاهرات ثم الافراج عنهم باعتراف وكالات الانباء الفرنسية نفسها
- اعتقال 7 من قادة المظاهرات الشباب يوم الخميس ليلا باعتراف احمد شفيق نفسه والنكتة انه قال ع الهوا مباشرة ده مش اعتقال ده التقاط ولم يتم الافراج عنهم الا امبارح للتهدئة
- و التلفزيون المصرى نفسه ادى محمود سعد باعطاء اجازة مفتوحة – اى اقالة – فى بداية المظاهرات لانه فى صفوف المحتجين
- اعتقال 6 من مراسلى الجزيرة ومصادرة كاميراتهم ثم الافراج عنهم واغلاق مكتب الجزيرة فى مصر واغلاق بث القناة على النايل سات ومحاولة اغلاقه على العرب سات ايضا وهذا كله ضد الحرية الصحفية اللى بيدعولها مبارك نفسه
6
القبض على اعضاء مراكز حقوق الانسان وترويعهم
 اقتحام مراكز حقوق الانسان والنشطاء فى ميدان التحرير والقبض عليهم عن طريق الشرطة العسكرية والسرية فى الوقت نفسه اللى خرج فيه رئيس الوزراء احمد شفيق وصرح بتعقب ومحاولة القبض على مسببى جريمة البلطجة ضد المتظاهرين فى ميدان التحرير وهو حاجة كوميدية الصراحة
بدل ميقبض على البلطجية بيقبض على اعضاء منظمات حقوق الانسان عشان يخفى جرائمه
7
القنابل المسيلة للدموع والعنف من جانب الامن ضد المتظاهرين 
استخدام الامن للقنابل المسيلة اللدموع اللى اترمت على المتظاهرين المسالمين وبعضها اترمى داخل محطة المترو على المتظاهرين فى محطة مبارك تحت الارض دون وجود تهوية كافية وده من مصادر لصحابى شخصيا وكمان استخدام الرصاص المطاطى والحى والضرب ضدهم
والعنف ده حتى لو كان قرار من حبيب العادلى رغم انى اشك فى كده خالص كان لازم مبارك ينزل بقرار فورى لايقاف العنف من الامن ومش يعمل نفسه نايم فى العسل ومش واخد باله وبعدين يقوله حرية التظاهر والتعبير عن الراى
8
جريمة سحب الامن المصرى من الشوارع والمدن
 جريمة سحب الامن المصرى من تالت ايام المظاهرات وساب الممتلكات العامة والخاصة للنهب من مجرمى السجون والبلطجية والشرطة السرية وادى الامن اجازة مفتوحة لمدة 10 ايام حتى يوم 8 فبراير بتدبير مقصود من وزارة الداخلية السابقة وهو امر كان مستحيل يتم الا تحت اشراف مبارك وبعمله وحتى لو مكنش بعلمه كان لما حصل كان لازم مبارك يلغى القرار الفاضح ده فورا اللى بينشر الخراب فى كل ربوع مصر وهى جريمة فى حق مصر بكل المقاييس
وهو كان مقصود عشان ينشر الهلع فى الشوارع ويلهى المتظاهرين بحماية الممتلكات وهو فضيحة بكل المقاييس وكمان نزل الجيش وساب المواجهة بين الجيش والشعب عشان يورط الجيش بس هو اثبت موقفه الوطنى ومعتداش على المتظاهرين
9
اخلاء السجون وتهريب المساجين
 جريمة تعمد اخلاء السجون وتهرييب المساجين لنهب الممتلكات فى الاول وبعدين ادوهم فلوس من 100 ل 400 جنيه عشان يهاجمو المتظاهرين فى ميدان التحرير وده واضح فى فيديوهات كتير انه منظم من مسؤلى السجن اى بقرار من فوق معتمد
ولما حاول ناس منع ده زى اللواء محمد البطران مدير سجن بالفيوم راحو قاتلينه بالرصاص فى صدره وده باعتراف ضمنى لابن اخوه على الهوا مباشرة
10
هجوم البلطجية على المتظاهرين تحت راية تاييد مبارك وارتكابهم للجرايم
لما البلطجية والمساجين هاجمو المتظاهرين فى ميدان التحرير تحت راية تاييد مبارك بالقنابل المسيلة للدموع وقنابل مولوتوف والسكاكين والجمال والسيوف وارتكاب الجرايم الفاضحة بالقتل والترويع والترهيب وغير كده عملو حرايق قدام المتحف المصرى تفتكر مش دى جرايم يتحاسب عليها المسؤل وهو مبارك ووزير الداخلية
11
 الكلام عن الخروج الكريم زى الملك فاروق
 اولا لما طلب محمد نجيب وجمال عبد الناصر من الملك فاروق السفر وترك الحكم او انه يحصل المظاهرات فى الشوارع وممكن الناس تموت راح الملك فاروق اتخلى عن الحكم وسافر فورا وممسكش فى المنصب وقال انا هقعد لفترة معينة بس وساب حالات السلب والنهب فى البلاد زى ماعمل الطاغية اللى هو المسؤل عن كل اللى بيحصل من بداية المظاهرات من السلب والنهب والقتل والاشتباكات وكان ممكن حل كل ده بالاستقالة فورا
تانيا الملك فاورق نفسه مقمش باى عمليات قتل وترهيب وسلب للشعب المصرى من المدنيين زى ماحصل فى الفترة دى وخرج فورا وعشان كده كان لازم يخرج كريما بتحية عسكرية من مصر بس الطاغية ده لازم بتحاكم بكل الجرائم دى
ثالثا مش لمبارك حق فى البقاء لحظة فى الحكم ولا حتى هذه الاشهر المتبقية عشان يموت على ارض مصر زى ماهو عايز الملك فاروق نفسه مقعدش فى الحكم لحظة ده خرج فورا ومات خارج مصر سكران ومش على ترابها زى ماعايز مبارك اللى ملوش اى حق انه يحقق النعمة دى   

اللى بيقول انه لو مبارك معملش بكلامه او الرئيس الجديد طلع فاسد هنعمل ثورة تانية


على اساس ان فيه زرار بنضغط عليه وبنعمل ثورات الصراحة صعب تكرار مظاهرات تانية زى دى فى نفس النظام الحاكم العسكرى الصارم ده الا بعد 20 سنة ع الاقل انا مش بحبط حد والله بس خلينا نتكلم بعقلانية واحب اقول فيه نقطتين مهمين اوى
اول حاجة مستحيل تجمع كل الناس دى تانى من الاول ودلوقتى هيبداو يراقبو النت لانهم عرفو انه مصدر خطر ممكن يعمل شوشرة لان كان مستحيل حدوث اى ثورة من غير النت ده وقبله مكنش حد عارف يتجمع هيراقبو الجروبات ويمسكو اصحاب الجروبات والى بيدعو للتجمعات السياسية ع النت
والنقطة التانية نص الشعب اصلا اللى معظمه من البسطاء والعمال وموظفى الحكومى الغلابا مش هيدخل فى مظاهرات تانى لان الناس تعبت بجد وحالتها وحشة من غياب الامن والفوضى والاقتصاد اللى بينهار وعطلة الشغل
الصحوة صعب تتكرر تانى فى نفس النظام ده والاحتياطات الامنية هتزيد بعنف سواء بين الاحزاب او الصحفيين او الشباب ع النت واظن رغم حرق 25 قسم شرطة وخروج الملايين والاعتصامات فى ميدان التحرير وتدخل الجيش وكل اللى حصل والضغوط الخارجية العنيفة من كل دول العالم الا ان النظام عرف يستميل تقريبا نص الشعب فى الاخر لمجرد خطاب من مبارك مدته 10 دقايق

مبارك والنظام مش هينفذو اى من وعودهم او معظمها وهقولك ليه

1
مبارك لسه فى ايديه كل سلطات الدولة ومفيش اى تغيير فعلى اصلا حصل لحد دلوقتى
الناس مش واخدة بالها ان مبارك لسه هو اللى فى ايده كل حاجة فى البلد ومفيش سلطة قضائية عليه ابدا ولا على مجلس الشعب اللى معظمه حزب وطنى
والمشكلة ان مفيش اى قرار او حاجة حصلت فعليا على ارض الواقع كلها من نوعية هنعمل وهنعمل وهنسوى اذا كان والمظاهرات والاحتجاجات شغالة ومبارك لسه معملش اى حاجة كل اللى عمله جاب حكومة فاسدة زى اللى قبلها وغير اعضاء الحزب بتانيين فاسدين وكمان عمال يقبض على قادة المظاهرة الشباب وشوية حاجات تهدئة لحجز الوزرا السابقين اللى بيضحى بيهم ككباش فدا وممكن حتى بعد كده يمط فى محاكمتهم لغاية مالناس الغلابا تنسى
ولو شوفتو كلام عمر سليمان لما اتفاوض مع الاحزاب والاخوان قال انا مليش اى سلطة او حاجة اعملها والامور كلها بايد مبارك وبس يعنى حتى الوعود دى كلها مفيش ضمان انها تحصل ومحدش هيقدر يلومه او يحاسبه عليها وومادام مش هيلغى قانون الطوارىء يبقى محدش هيقدر يفتح بوقه واللى هيتكلم هيعتقل على طول ولما عمر سليمان اتفق ان الغاء قانون الطوارىء تبعا للظروف الامنية دى جملة ممطوطة جدا وعلى حسب رؤية الرئيس نفسه يلغيه ولا لا وطبعا مش هيلغيه بعد المظاهرات على طول عشان يلم كل القادة الشباب والاخوان والاحزاب وهيقول البلد لسه مش فى حاله امنة ومحدش هيعرف يكلمه مهو لازم ينتقم وساعتها هيبقى حقه ينتقم لو دنيتكو ساكتين دلوقتى
مبارك كل اللى عمله من تعتيم اعلامى وترويع للصحفيين واعتقال للشباب والصحفيين والضرب وانزال البلطجية واخلاء السجون وسحب الامن من الشوارع من الاخر قتل فى الشعب بقنابل مسيلة للدموع وقنابل مولوتوف ورصاص مطاطى ورصاص حى كل ده من اساليب رخيصة جدا ودنيئة عمله عشان يوقف المظاهرات بس تفتكر بعد المظاهرات هيعمل حاجة انت عندك عقل ولازم تفكر
الرئيس بقاله تلاتين سنة وعود ومفيش حاجة بتحقق ومادام هو مصر انه يعدل الدستور بنفسه عشان يبقى فوق سلطة القضاء هو ومجلس الشعب بتاعه يبقى محدش هيعرف يحاكمه ولا حتى رئيس سلطة القضاة ولا اى محامى فى مصر وقانون الطوارىء مش هيتلغى عشان يعتلقو براحتهم كل ده للتهدئة بس
2
الحكومة الجديدة الفاسدة برضه
الوزارة الجديدة او حكومة الاصلاح زى ماسموها
اولا ساب 6 او 7 وزراء من الوزارة القديمة رغم انه وعد بتغيير الوزارة والحكومة جذريا
ثانيا منهم وزير البترول اللى كل سنة فيه وقفات احتجاجية عليه من دفعات كلية هندسة البترول عشان مفيش وظائف وهو اللى مرتبه يقال انه مليون ونص شهريا
ثالثا منهم وزيرة القوى العاملة اللى هى مسؤلة عن البطالة
رابعا عين وزير الداخلية السفاح الحالى محمود وجدى ده مصطفى الفقى طلع وقال عليه انه ميستبعدش انه هو المسؤل عن جريمة البلطجة ضد المتظاهرين لانه متشدد جدا ومن مدرسة زكى بدر اسوا وزير داخلية فى مصر فى التمانينات ونشط جدا واستبعد ان امر زى خروج البلطجية ومهاجمة المتظاهرين مش ممكن انه يتم من غير علمه طبعا مصطفى الفقى كان مستشار الريس لعدة سنين فى التمانينات ودلوقتى بيدخل الحزب الوطنى بالتعيين مش بالترشيح حتى وهو خاف يقول ان مبارك مسؤل عن اللى حصل بس قال ممكن وزير الداخلية وده فى حد ذاته فضحية ان اول خطوات الاصلاح لمبارك هى وزارة الداخلية وعين سفاح بدل سفاح وعشان كده لازم النظام كله يسقط وهو كمان المسؤل عن مقتل خمسة فى الوادى الجديد بعد اشتباكات الامن مع متظاهرين بالرصاص الحى واصابة العشرات منهم انفجار فى مقلة العين
خامسا رئيس الوزراء احمد شفيق وعمر سليمان نفسهم من داخل الجيش يعنى استمرار سيطرة نظام الحكم من الجيش والامن الصارم على البلد ومش نظام مدنى يحافظ على حقوق المدنيين وقريب من مطالب الشعب وكمان معروف للكل ان النائب عمر سليمان مشهور بعلاقته الوطيدة ومعاملاته الكبيرة مع مسؤلى اسرائيل وامريكا
سادسا تم ترشيح رشيد محمد رشيد فى الوزارة الجديدة فى نفس منصبه اللى فات وزير التجارة والصناعة بس هو رفض وهو بالنسبة الى خطاب مبارك انه من رموز الاصلاح فى وزارة الاصلاح الجديدة وبعد اسبوع راح النائب العام منعه من السفر وتجميد ارصدته واملاكه كفرد من النظام الفاسد القديم طب لو هو فاسد بجد امال كانو عايزين يدخلوه فى الوزارة الجديدة الاصلاحية ليه ولو مش كده وهو راجل شريف زى مبعض الناس بتقول طب اشتبهو فيه ليه ممكن مثلا ده عقاب ليه لانه رفض الدخول فى الوزارة الجديدة ويساند مبارك فى الحالتين فضيحة للنظام
سابعا انهم اعلنو فى البداية خالص ان مبارك عشان يعدل الدستور لازم يحتاج ع الاقل 70 يوم لاننا لازم نمشى على خطوات تشريعية محددة ومينفعش تقل عن كده عشان كده لازم يستمر ومش هتفرق 70 من 200 يوم ده كان كلام عمر سليمان فى حوار تلفزيونى
بس امبارح اعلنو ان الجمعية الدستورية دى هتخلص تعديل الدستور فى 20 يوم بس لما لقو فيه ضغط كبير جدا من المظاهرات عشان يطمنو المتظاهرين ان التعديل هيتم فى ظرف 3 اسابيع بس مش شهرين ونص متقلقوش وامشو بقى مش ملاحظ ان فيه تخبط فى تصريحات الحكومة
ثامنا تصريح عمر سليمان لقناة امريكية وقال ان الشعب المصرى غير جاهز للديمقراطية مامعنى هذا التصريح فى رايك الشخصى
تاسعا لو انت عايز اعتمد على وثائق ويكيليس بتاع قطر واسرائيل شوف وثائق امبارح بتاعة عمر سليمان وانت هتقرا حاجات حلوة اوى عن نائب الرئيس الجديد اللى من اولى خطوات اصلاح مبارك
3
اعتقال الصحفيين وترهيبهم
4
القبض على اعضاء مراكز حقوق الانسان وترويعهم
5
القنابل المسيلة للدموع والعنف من جانب الامن ضد المتظاهرين
6
جريمة سحب الامن المصرى من الشوارع والمدن
7
اخلاء السجون وتهريب المساجين
8
هجوم البلطجية على المتظاهرين تحت راية تاييد مبارك وارتكاب الجرايم
9
ركز فى حديث مبارك مع قناة امريكية
مبارك مذكرش كلمة اخوان مسلمين ممكن يمكسو الحكم بعده الا لقناة الايه بى سى الامريكية ليه بقى
هقولك عشان بيحذر امريكا انه لو ساب الحكم مصر هتتحول لدولة ايرانية وفعلا لهجة امريكا بدات تخف ومبقوش عارفين يقولو حاجة غير تصريحات مكررة ومفيش اى ضغوط او تهديدات حقيقية من امريكا هى اوقات بتعملها عادى بصفتها قطب القوة الوحيد على الارض
طب ايه اللى عملته امريكا هو خبر صغير غالبا محدش خد باله منه وهو حوارات بين وزارة الخارجية الامريكية ووزير الدفاع المصرى ليه
هقولك ياسيدى بيقولوله لو النظام والرئيس معرفوش يحفظو الامن ويقللو الاشتباكات والمظاهرات انت لازم تتدخل والجيش يعمل انقلاب ع الرئيس عشان يستمر الحكم العسكرى لمصر ودى هتبقى استمرار مصلحة امريكا احسن من الحكم المدنى عشان يحافظو على العلاقة مع امريكا واسرائيل وفى نفس الوقت الناس هتفتكر انها كده صلحت البلد
وكمان لقينا يوم السبت ان مبعوث امريكا قال تانى يوم ان مبارك لازم يستمر فى السلطة عشان يعمل التعديلات يعنى بين قوسين انه يعمل السياسيات والدستور عشان يستمر نفس النظام والحكم بعد ميمشى فى شهر 9
وزيه برضه كل تصريحات الاتحاد الاوروبى اللى اتغيرت فجاة بعد خوفهم من تغير فورى للسلطة ومسك الاخوان للحكم وتحولنا لايران جديدة
10
ركز فى طريقة حوارات احمد شفيق
احمد شفيق رئيس حكومة الاصلاح الجديدة بيطلع علينا كل يوم 3 مرات فى كل وسائل الاعلام بوجه البشوش الهادى الطيب اللى بيدوب قلب المصريين الغلابا وبكلامه الهادى الراسى اللى كل الناس مستريحاله من قلبها كده
ونحب ناخد تصريح مهم ليه
قال احنا مش هنعتقل المحتجين فى ميدان التحرير خالص لكن القاء القبض على 7 ده كان مجرد التقاط بس ومش اعتقال عشان هما متصلين برجل مهم بنخشى منه بيقصد البرادعى وطبعا كان لازم يخرجهم بعد كده عشان يعمل تهدئة كانه كده بيحقق وعوده طب مانت اللى اعتقلتهم من الاول ياعمنا
طب اذا كان والمظاهرات شغالة دلوقتى وانت بتعتقل فى قادة التظاهر امال ايه اللى هيحصل لما المظاهرات تخلص والناس تنشغل فى الحياة العامة ومسلسلات رمضان ومباريات الاهلى والزمالك والمليون ونص شرطى يرجعو للشارع


طب ايه اللى هيحصل بعد كده لو الرئيس نفسه مسقطش

هو ده اللى هيحصل لو عرفو ينهو المظاهرات تماما واول ميشم النظام نفسه ويهدا الراى العام العالمى
هتحصل عملية الانتقام الكبير وهتتلخص فى الاتى
1
مش هينفذ النظام اى من وعوده او معظمها
للاسباب اللى ذكرناها فوق
2
عدم الغاء قانون الطوارىء
كل كلام عمر سليمان عن الغاء قانون الطوارىء مش هيتلغى ياجميل لانه حط جملة تبعا للظروف الامنية وخليك ذكى كده لانهم هيعتبرو البلد فى حالة امنية خطيرة لكذا شهر قدام ع الاقل عشان الاضطرابات اللى حصلت فى البلاد لحد ميملو المعتقلات بكل اللى كانو متظاهرين اللى كانو بيتمسكو والمظاهرات مستمرة ومحدش اعترض
طبعا هيتم الاعلان انهم هيحاولو يمسكو كل العناصر المخربة اللى هاجمت المتظاهرين المسالمين طبعا المخربين اللى هما هيكونو احنا طبعا اذا كان هما اللى طلعو المساجين تحت اشراف شرطة وزارة الداخلية الجديدة وده ظاهر فى فيديوهات كتيرة ازاى المساجين كانو بيهربو
يعنى ممكن اى رئيس ينزل اى بلطجية ليه ويعملو تخريب ويطبقها كل شوية ويقول فيه حالة امنية عنيفة فى البلاد عشان يعتقل المعارضين
3
عدم الرقابة على تعديل الدستور
كل كلام عمر سلميان عن تنظيم اللجان وعشرات المراقبين لتعديل الدستور مش هيحصل لانه واخد باله ان فيه تخبط فى الاحزاب وقادة الشباب ومفيش اى اجتماع عام على حد او لجنة معينة حتى فى المناقشة العادية مع النظام دلوقتى وهو هيستغل الوقت وهيمط فيه ومبارك هو اللى هيضطر انه يعدل الدستور بنفسه فى الاخر من اجل مصلحة مصر العليا تحت اشراف امريكا عشان ميمسكش الحكم اى جماعات متطرفة او ناس مدنيين
حتى الانتخابات او الرقابة القضائية مش مضمونة عشان التعديلات الدستورية اللى هيصدق عليها مجلس الشعب الحالى اللى معظمه من الحزب الوطنى
سبب غريب جدا من عمر سليمان من كذا يوم لما قال انه مش هيفض مجلس الشعب الحالى عشان هو اللى هيصدق على قرارات تعديل الدستور طب ازاى مجلس مطعون فى شرعيته هو اللى هيعمل كده متسالنيش بقى
4
استمرار النظام العسكرى الحاكم لمصر
المشكلة مش فى مبارك ولا جمال ورغم انى قولت ان فيه مظاهرات مدبرة ممكن تتم بعد نوم الناس العميق كمان ست شهور قبل الانتخابات مؤيدة لجمال بالالاف على غفلة كده ويضطر جمال انه يترشح للرياسة
بس الفكرة مش فى جمال او مبارك المشكلة فى النظام العسكرى للدولة والحزب الحاكم والقيود الامنية على الشعب
5
اعتقال قادة الشباب المتظاهرين
هيبدا شغل المليون ونص شرطى وامن دولة هيتم اختفاء معظم قادة الثوار من الشباب ومنهم اسماء محفوظ فجاة كده زى وائل غنيم بين قوسين اعتقال
اذا كان فيه 7 اعتقلو من قادة المظاهرات من الشباب والمظاهرات شغالة والراى العام العالمى هايج ومحدش خد باله ياعمنا
6 
اعتقال قادة الاخوان والاحزاب
هيتم اعتقال معظم قواد الاخوان المسلمين واعضاء باحزاب المعارضة ومنهم السيد البدوى وايمن نور وتلفيق التهم
7
عدم التعرض للبرادعى
استبعد انه ممكن يحصل اعتقال او الاقتراب من البرادعى عشان مكانته الدولية الكبيرة لكن طبعا هيعتقلو اتباعه تانى بس فى الخبينى كده حوادث اختفاء مفاجىء
8
عدم تعقب كل من سب النظام
طبعا من المستحيل عمليا ونظريا ومنطقيا تعقب كل اللى قام بسب وشتم النظام على الهوا او فى المظاهرات او على النت من شباب او كتاب او ممثلين او صحفيين وهيتم تركهم عشان ميحصلش بلبلة فى الراى العام بس ممكن اعتقال حبة من الناشطين والصحفيين والمحامين الصغيرين
السجون فاضية ياعم مين اللى هيملاها
9
ايه هو موقف امريكا والاتحاد الاوروبى بقى
واحد هيطلع ويقولى وموقف امريكا والاتحاد الاوروبى ياعم فين
هقوله امريكا كل الى يهمها فى الاساس عدم تحول مصر لدولة تركية ولا ايرانية واستمرار مصالحها باستمرار مبارك او غيره من الحزب او قواد الجيش
والاهمية الاقل بالنسبة لامريكا وقف النزاعات والمظاهرات بين الشعب المصرى كمظهر حضارى لامريكا بالنسبة للعالم كانها بتسعى للاستقرار لكل دول العالم
بس ميهماش خالص مطالب الشعب هى اتحققت ولا لا بعد نهاية المظاهرات فعلى مدار 30 سنة وامريكا مطمنة وبالها مرتاح على الحكم والاستقرار المصرى رغم فقر وبطالة وقهر الشعب
بعد اخماد المظاهرات هتهدا امريكا ومش حتى هتبالى باى محاكمات او محاسبات عشان استمرار مبارك او بمعنى اصح النظام هو قمة الاستقرار لامريكا  وهتكتفى بس ببعض البيانات المؤيدة للاستقرار وتحقيق مطالب الشعب الوطيدة وتشجيع استقرار المنطقة والهبل ده
10
قرارات تهدئة ومحاكمة شوية وزرا سابقين
طبعا هيبقى شوية قرارات تهدئة ومبارك والنظام ممكن يضحو باى حد من الوزارة حتى لو حاكموهم عسكريا
حتى كل المحاكمات محصلتش لسه ومحدش عارف ايه اللى هيحصل ممكن تبقى محاكمات طويلة الاجل ويقعدو سنتين او تلاتة فى نقوض واستئنافات ورا بعض وهبل وكده ومحدش هيتحاسب لما الناس تنسى
كلها قرارات تهدئة وتليين للراى العام الشعبى لكن مفيش اى حاجة حصلت خالص لحد دلوقتى مفيش اى حاجة بايدينا نمسكها
انت مش حاسس بحاجة دلوقتى وفرحان بكل الوعود دى بس بجد دى المراحل اللى هتحس بيها بفشل الثورة صدقنى
-         مش هيظهر انها نجحت فى 80 فى المية بس من المطالب عند هدوء الجو العام الداخلى والخارجى وهدوء المظاهرات وعودة الشرطة للشارع
-         ومش هيظهر انها محققتش الا اقل من 50 فى المية من المطالب الا مع الانتخابات الرئاسية فى شهر 9 وتولى جمال او غيره من اعضاء الحزب او من قادة الجيش الحكم وهتظل مصر فى نفس المؤسسة والنظام العسكرى
-         ومش هيظهر انها معملتش الا 30 فى المية او اقل كمان من المطالب الا بعد سنتين على الارجح لما الشعب يشوف نفسه ويشوف نظام الحكم تحت الحاكم الجديد وكان مبارك بس هو سبب كل هذا الخراب


اهمية عدم تغيير مبارك ومجلس الشعب الحالى للدستور

الدستور ده هو اللى هيحققلنا كل حاجة هو اللى هيخلى الرئيس ومجلس الشعب تحت سلطة القضاء وهيفصل وزارة الداخلية عن كل الهيئات وهيلغى قانون الطوارىء وغير كده كل دى وعود وبس ومحدش هيعرف يطالب حد بيها بعد انتهاء المظاهرات من غير متحقق لازم الرئيس نفسه يسقط
لازم تفهمو ده ياشباب ومتضيعوش حقكو فى البلد احنا شعب 7000 سنة حضارة شوفو امريكا شعبها من 400 سنة بس ووصل لدستور منظم من 250 سنة ومتغيرش ولا اى رئيس يعرف يغيره لحد دلوقتى ومحدش فاهم فينا فى القرن ال 21 يعنى ايه ديمقراطية حقيقة
اهم حاجة تعديل الدستور عن طريق لجنة دستورية من سياسين شرفاء ومفكرين وعلماء تحت اشراف ممثلى ثورة الشعب الحقيقيين فيما عدا ذلك مفيش اى تغير هيحصل حتى لو قالو هيوزعو فلوس ع الشعب بعد كده هتستمر الاعتقالات والقيود الامنية ومحدش هيحقق وعوده لان هيبقى مفيش سلطة قضائية لا على مبارك او الرئيس الجديد او مجلس الشعب
لكن مبارك لما يتخلع ويتحاكم وفلوسه ترجع اقتصاد البلد لصالحها ويتعدل الدستور من ممثلى الشعب حقيقين مينفعش اى رئيس جديد انه يغيره الا بوجود هيئة رقابية عليه وانه يبقى فيه سلطة قضائية على الرئيس ومجلس الشعب وكل واحد فى البلد ساعتها واى حد فى البلد هيفسد هيتحاكم قدام الناس ساعتها هو ده الصح اللى لازم يحصل والا هنبقى بنلف فى نفس الدايرة اللى احنا فيها من 60 سنة
المشكلة مش فى مبارك او جمال تانى بقولها المشكلة فى نظام الدولة العسكرى وسيطرة الحزب والدستور اللى مش هيتعدل صح واى رئيس جاى هيمسكنا هيمص من دمنا برضه ومش هيبقى فيه رقيب عليه ولا على الانتخابات
وكل المظاهرات اللى هتطلع بعد كده هتتخمد من اولها عشان هيبقى فيه رقابة ع النت وهيبقى فيه اعتقالات والناس نفسها مش هتحب تكرر كده تانى 


بالنسبة لنقطة ان مبارك لازم يستمر عشان هو الوحيد اللى ليه صلاحية انه يغير الدستور

بالنسبة لنقطة احمد شفيق عمال يكررها كل يوم وهى ان مبارك الوحيد هو اللى حق فى تغيير الدستور وان ده بيستغرق 70 يوم هقول فيه تلات حلول

اول حل
ان مبارك يشكل حالا جمعية تاسيسة من سياسين شرفاء البلد ومفكرين وعلماء وقوى المعارضة تحت اشراف ممثلى الثورة لتعديل الدستور وساعتها حق تعديل الدستور هيخرج من نطاقه ومن نطاق مجلس الشعب اللى لازم يتحل كله ويحل عننا بقى الطاغية ده اللى عايز يخربها حتى بعد ميمشى

تانى حل
وهو حل منطقى قايم على نظم الدستور نفسها وده حل من الكاتب ناصر فرغلى بالترتيب الاتى
- يحل الرئيس مبارك مجلس الشعب طبقا للمادة 136.
- يستقيل الرئيس مبارك ويتولى الرئاسة رئيس المحكمة الدستورية العليا لعدم وجود مجلس للشعب، وفقا للمادة 84.
- يدعو الرئيس المؤقت الشعب لاستفتائه على تعديلات دستورية وفقا للمادة 152 التي تخوله التوجه الى الشعب مباشرة للاستفتاء في الامور التي تتعلق بالمصالح العليا للبلاد. وتوفر هذه المادة مخرجا من التقييد الذي تفرضه الفقرة الثانية من المادة 82، بلجوء الرئيس المؤقت إلى الشعب مباشرة، خصوصا أن المادة الثالثة التأسيسية في الدستور الحالي تنص على أن السيادة للشعب وحده وهو مصدر السلطات، فما يوافق عليه الشعب في استفتاء يتجاوز منطقيا في قوته سلطان ممثلي الشعب.
- تجرى انتخابات نيابية ورئاسية وفقا للتعديلات، ويمكن مناقشتها بأثر رجعي في مجلس الشعب المنتخب إذا ارتأى لذلك حاجة وفقا للمادة 147
وبكده مبارك يخلع ويتحاكم من غير ميقعد على قلبنا 6 شهور لحد ميخرب هو الدستور بنفسه

الحل التالت
الدستور المصرى هو اللى وضعته ثورة 1952 الحاكمة حكم عسكري لمصر واللى حاولت القضاء على معظم الاحزاب السياسية والاخوان وانتشار المعتقلات فى عصرها
طبعا مينفعش اطلاقا المساس بيه لان مصر دولة كبيرة ودستورها كبير بس زى اراء كتير من المحللين السياسين دى حالة طوارىء قصوى فى البلاد زى حالات الحرب والانقلابات والثورة دى ثورة على النظام الحاكم نفسه وممكن يتم تعديل الدستور من لجنة موحدة من السياسين الشرفاء والمفكرين والعلماء وقوى الشعب والمعارضة لجنة دستورية تعدل الدستور فى النقط الهامة فقط هى تتراوح فى خمس او اربع نقط هى الاهم حاليا حتى يتم اجراء الانتخابات الرئاسية ومجلس الشعب العادلة

وفيه نصحية اضافية لكاتب ناصر فرغلى احب اقولها هنا
أن ينص الدستور المعدل على أنه مؤقت لمدة عام أو عامين يجري فيهما الحوار المجتمعي بمنتهى التوسع والعمق والشفافية حول مسائل جذرية في دستور مصر المستقبل لا يمكن حسمها في شهور قليلة، ولا يمكن الاستمرار في تجاهلها
لكن احمد شفيق وعمر سليمان نفس كلامهم بيتكرر وبيتعاد من غير حتى مايردو او يحاولو يكدبو الحلول دى ونفس التعتيم والتنويم الاعلامى منهم ولا حول ولا قوة الا بالله
 


والفوضى اللى بيقول كفاية كده ووقفو الفتنة 

مين هو المتسبب فى كل الاشتباكات دى كلنا عارفين ان الاشتباكات دى محصلتش الا مرتين اولا عند وجود الامن والعنف الواضح من طرفهم والمرة الثانية عند هجوم بلطجية وامناء وتابعى الحزب على المتظاهرين فى ميدان التحرير
طب انت مش شايف ان المتسبب فى كل الفتنة والاشتباكات دى هو النظام الحاكم عشان تعامله العنيف مع المتظاهرين بالاساليب الملتوية وعشان رفضهم لتحقيق المطلب الرئيسى للتظاهرات وهى اسقاط النظام نفسه
هو مش المتظاهرين دول نفسهم هم اللى شكلو لجان شعبية لحماية الممتلكات وتنظيم المرور فين بقى سبب الفوضى والفتنة فى مصر ولما حصل مظاهرات فى غياب الامن والبلطجية محصلش ولا اصابة ولا تكسير محل ولا تحرش
هو مين اللى سحب الامن من الشوارع وطلع المساجين وطلع الجمال وضرب بقنابل المولوتوف والقنابل المسيلة للدموع والرصاص الحى كده الفتنة والفوضى دى مين السبب فيها


اللى بيتكلم عن وقف خساير مصر الاقتصادية ووقلة موارد الغذاء وعن الناس اللى شغالة باليومية ومش لايقة تاكل

هى مش مصر خسرت فى عهد مبارك فبدلا من ان كانت الديون سنة 1981 حوالى 12 مليار جنيه بقت فى 2010 حوالى 33 مليار دولار اى مايعادل 180 مليار جنيه ده المعلن وفيه مصادر بتقول انها 800 مليون جنيه مش لو احنا استحملنا وتكاتفنا هنعيد بناء اقتصاد صح حتى لو بعد 10 سنين بدل ميقعد كل شوية يحكمنا حاكم فاسد ويمص من دم الشعب المصرى ويسرقه والديون بتزيد والاسعار بتغلى ومحدش فاهم ليه

طب وثروة مبارك دى انت موافق 70 مليار دولار اللى خدها من فلوس الشعب اللى اكبر من ديون مصر الخارجية دى موافق انه ياخدها ويمشى بيها وميتحاسبش عشان تروح الجامعة والناس تروح تاكل فول وطعمية فى الشغل الحكومى
مش الفلوس دى ممكن تحل ازمات مصر الاقتصادية وتغطى ديونها الخارجية ده غير فلوس احمد عز وباقى حرامية البلد يبقى فين الاستقرار الاقتصادى
لو انت شايف ان الشعب دلوقتى مش لاقى الاكل والناس اللى عايشين باليومية اتضررو طب ال 48 فى المية من الشعب اللى تحت خط الفقر دول خلال ال 30 سنة اللى فاتو دول راحو فين انت لو زعلان دلوقتى ان الاكل والموارد الغذائية قلت او فيه ناس مش عارفة تجيب رزقها طب انت مش هتزعل اكتر ان الشعب نفسه نصه مش عارف ياكل خالص اصلا فى ظل حكم مبارك او النظام ده
هو مش كان كل ده ممكن يخلص لو مبارك كان ساب الحكم من ايام المظاهرات الاولى بعد مكتبو يسقط مبارك على كل الدبابات وفى الشوارع والميادين والكبارى وتقطيع صوره تفتكر كده مين كده اللى سبب فى استمرار انهيار الاقتصاد الحالى


اللى بيقول عدد المتظاهرين دلوقتى مش بيعبر عن الشعب

1
هو لازم الشعب كله يخرج ! تونس ماخرجوش كلهم هل عندك شك على اغلبية كارهي بن علي هناك ! اخ تونسي يدخل دلوقتي يقولك العدد بالظبط لاني سمعته ومش فاكره بصراحة !
انت بتاخد الاغلبية الصامتة ليه على انها مؤيدة ! هو مش استفتاء شعبي عشان تقول الكلام ده !
وبعدين حسني مبارك نفسه نجح ب 7 مليون بس ووقتها قول كنا 70 مليون مجازاً بنفس منطقك يبقى في 63 مليون مصري لم يرشحوا مبارك !
ثورة 32 يوليو شوية ظباط قاموا بيها  وقعدنا طول عمرنا ندرس في ام الثورة دي و هي انقلاب اصلا !
الموضوع مابيتقاسش كده انت عندك من اول 25 اكتر من 10 مليون نزلوا مظاهرات في مصر قيس بقى كام واحد قدامهم نزل في مظاهرات مؤيدة لمبارك ووقتها هتعرف رأي الغالبية في بلدك    !

2
وبعدين فيه نقطة مادام انت خرجت وبتومن بكل مطالب مظاهرة 25 يناير وانها مظاهرة شعبية عامة انت نفسك هتقدر تقول ان مظاهرة 25 يناير عدت حاجز 8 مليون حتى ولو حتى قولتلى 20 مليون حتى
امبارح باعتراف جميع وكلات الانباء زى السى ان ان والبى بى سى دى اكبر مظاهرة حصلت من بداية الثورة
وعلى حسب كلامك كده ان مظاهرة 25 يناير دى مش مظاهرة مشروعة وبقية الشعب ال 70 او 60 او 50 مليون اللى مخرجش ده مش مع مطالب الثورة ويبقى كده مظاهرة 25 يناير دى مش مظاهرة شعبية عامة
3
وعلى فكرة هقولك حاجة تانية بخصوص الارقام انت عارف ان 200 الف متظاهر فى امريكا فى الستينات هما اللى غيرو الدستور الامريكى وغير النظام الامريكى بالكامل فى التعامل مع السود واعطائهم حقهم الكامل فى كل قطاعات الدولة طب باقى ال 200 مليون الامريكين دول اللى مخرجوش واعترضو يبقى معنى كده انهم مش موافقين ومعنى كده ان مطالب ال 200 الف دول غير مشروعة وغير شعبية

 الخوف من التدخل الاجنبى

 
التدخل الخارجى مش هيحصل فى مصر الا بسبب واحد اصرار مبارك على موقفه وتجاهل المظاهرات ولو مجلس الامم المتحدة بعتت قوات حفظ سلام هتبقى عشان فض الاشتباكات بين بلطجية مبارك والمتظاهرين لكن المظاهرات كلها سلمية وليها حقوق لازم اى رئيس ينفذها غصب عنه ولو هو منفذهاش وحاول يخمدها بالعنف يبقى الدول الاجنبية هتتدخل
يبقى انت شايف كده مين المسؤل احنا ولا النظام

الراى العام العالمى مزادتش لهجته الا تلات مرات بس
الاولى لما حصل اشتباكات بين المتظاهرين والامن العنييف جدا جدا بالقنابل المسيلة للدموع
التانية لما هجمو البلطجية على المتظاهرين بالجمال وقنابل المولوتوف
التالتة لما قام الامن السرى والعسكرى بضرب الصحفيين الاجانب وترهييبهم وطردهم من ميدان التحرير ليلة الخميس اللى فاتت ومراسل السى ان ان الامريكية نفسه اتضرب
يبقى كده مين اللى هيسبب تدخل اجنبى فى مصر فى رايك
والنظام لما يقع زى الخطوات ذكرتها اللى قالها الكاتب ناصر فرغلى مش هيحدث تدخل اجنبى وهيتم الانتخابات فى اجراءات قانونية تماما وهيتم تعديل الدستور وانتخاب الرئيس الجديد ومجلس الشعب الجديد فى خلال 3 شهور بالكتير فى ظل اجواء هادية ومنظمة

اللى خايف من الدخول فى حرب مستقبلية مع اسرائيل

1
اولا هبدا معاك بنقطة الاعتدال انت لو بتتكلم على الغاء معاهدة السلام مع اسرائيل وعدم تصدير الغاز فقط
بص خلينا متفقين ان فى النقطة دى بالذات دى اراء شخصية خاصة بيك زى مانا ليا رايى الخاص وفى الحالتين مفيش دخول فى حروب
وهقولك اننا كرايى الشخصى الخاص بيا وحدى شايف ان الانسحاب مع علاقات اسرائيل بالذات تتم بشكل تدريجى مش بشكل فورى وقاطع لانها ممكن الاستغناء عنها
يعنى تصدير الغاز انا معترض عليه طبعا انت بتساعدهم وبتصدرلهم وبتساندهم وهما بيقتلو فى شعب عربى ومسلم
لكن هقولك حاجة مش معنى اننا نلغى اتفاقية السلام او تصدير الغاز بطريقة تدريجية اننا بنعلن الحرب على اسرائيل انت نفسك شايف جميع الدول العربية وحتى الدول المحيطة باسرائيل نفسها ومفيش اى اتفاقيات او علاقات اقتصادية مابينهم يبقى ايه لازمتها
وعلى فكرة اسرائيل نفسها متقدرش انها تتجرا على مصر وهى اللى تحاول تحاربها لان الجيش المصرى اقوى جيش فى المنطقة العربية وعاشر اكبر جيش على مستوى العالم باعتراف مسؤلى اسرائيل نفسهم فى الاعلام لانهم خايفين ان نظام مصر الحالى يولد نظام اخر يحاول يحاربهم
2
نيجى نتكلم على نقطة التطرف اى قطع كل العلاقات مع اسرائيل وامريكا والدول الغربية والاستعداد للدخول فى الحرب لتحرير القدس او لاسباب تانية
انت لازم تعرف ان اهم حاجة فى الثورة الحالية من خلال تعديل الدستور ان الرئيس نفسه يبقى تحت سلطات القضاء والرقابة وميبقاش ليه قرار فردى وفى ايديه كل سلطات الدولة يلعب بيعا ويغير براحته زى ماحنا شايفين حالين وطبعا مش الرئيس بس يبقى كل فرد ومؤسسة فى الدولة
يعنى مش هينفع ان الرئيس الجديد المنتخب يجى فى يوم وليلة ويقولك هقطع علاقاتى مع اسرائيل وهنجهز جيش يحاربهم لازم يبقى فيه موافقات لمجلس الشعب وهيئات رقابية المهم ان الرئيس ميبقاش هو اللى فوق الدولة
والشعب كله مش عايز الحرب طبعا اذا كان اكتر من نص الشعب نفسه مقدرش يستحمل يومين فى المظاهرات وقال كفاية كده عشان الامن والفوضى واقتصاد البلد ونرجع لشغلنا
يعنى من الاخر احنا نفسنا اللى هنخليه يغير قراره او هنغيره هو نفسه وانت نفسك شفت ازاى نظام عسكرى ديكتاتورى من 30 سنة وقعه شوية شباب ع النت
3
نيجى نتكلم على خوفك ان الاخوان المسلمين لحسن يمكسو الحكم
اولا متفتكرش ان لما مبارك يسقط هيروحو فجاة ناطين ع الكرسى وقايلين احنا الحكام فيه خطوات هتتم وفيه رئيس مؤقت هتتم انتقال السلطة ليه فوريا وده اللى قولته فى الموضوع بالخطوات التفصيلية لو انت قريته اصلا والمفاوضات والظهور الكتير اللى بيعملوه دلوقتى بيحاولو انهم يدورو على دور ليهم فى الثورة قدام الناس زيهم زى باقى الاحزاب البتنجانة
تانيا المظاهرات دى بينتلنا اد ايه ان الاخوان دول مش معاهم الا اقل من 10 فى المية من الشعب والحكومة هى اللى كانت بتضخم فيها حتى مستحيل يكسبو فى الانتخابات بالكوسة عشان تكون مطمن لانها هتبقى انتخابات نزيهة وتحت اشراف رقابة دولية مش صناديق بتيجى مليانة بالاصوات
ثالثا لو انت مقتنع بكلام التلفزيون المصرى ان اللى بينظم المظاهرات حاليا هم الاخوان والمليون واحد دول كلهم اخوان بص يوم الاحد اللى فات الاخوان والاحزاب راحو اتفقو مع عمر سليمان صباحا على حبة نقاط بتاعة اللجنة التاسيسية وغيرها طب ايه اللى حصل المظاهرة المليونية استمرت فى نفس اليوم برضه واستمرت مظاهرات الاسكندرية وطالبو برفض قرارات سليمان والاخوان والاحزاب وبعدين اضطر الاخوان يتراجعو عن موقفهم تانى يوم يبقى ازاى كده انت بتقول ان المظاهرات دى كلها اخوان فكر بعقلك الاول وفيه نقطة مفصلة فى موضوعى برد فيها على كلام الاعلام عن ان تنظيم المظاهرات دلوقتى من الاخوان ممكن تقراها كمان
رابعا حتى لو الاخوان مسكو الحكم وده احتمال مستبعد جدا ارجع للنقطة رقم 2 فى ردى ده وهتعرف ان فيه رقابات وسلطات وموافقات لازم تتم الاول مش مجرد قرار فردى
وعلى فكرة انا كراى شخصى كفرد من الشعب المصرى انا مش هدى صوتى للاخوان بس ده زى مابقولك كراى شخصى لاننا مينفعش يبقى فيه اجبار للراى فى انت عايز مين الرئيس الجديد ولو عم حزمبل مسك الحكم انا مش هعترض مادام مع الاغلبية والانتخابات تحت الرقابة الدولية والدولة زى مابقولك مش هتبقى دولة افراد هتبقى دولة قرار جماعى
4
النقطة الرابعة كانت مفروض النقطة الاولى لانها الاهم بس انا قولت ارد على كلامك الاول
هى انت لازم تصلح البلد وتتخلص من رموز الفساد اللى خربو بيت الشعب المصرى ونهبو فلوسه وبيحاولو يقتلو فيه ومفيش حاجة اسمها خوف فيه حاجة اسمها امل
وفكر بعقلك من غير اى ديمقراطية انها تتطبق حتى ياسيدى اذا كان نظام عسكرى ديكتاتورى من 30 سنة وقعوه شوية شباب ع النت ويوم واماكن المظاهرات كانت معلنة قبلها بعشر ايام تفتكر فيه نظام قادم هيحاول حتى انه يفرض قرارته ع الشعب اعقل الكلام بدماغك
ولازم تحدد موقفك من الاصلاح بالظبط اللى انت عايزه
لو انت مش مع الثورة من البداية يبقى ارجو قراية الموضوع بتاعى كله وتعالى رد
لو انت مع ان مبارك مش لازم يمشى دلوقتى ومش مهم يتحاكم يبقى اقرا التلات نقط دى فى الموضوع ان مبارك لازم يتحاكم وان مبارك مش هينفذ وعوده وان ايه اللى هيحصل لو مبارك مسقطش
لو انت مع ان مبارك ميمشيش دلوقتى عشان يعدل الدستور اقرا النقطة بتاعة اهمية تعديل الدستور ونقطة بتاعة للى بيقول مبارك ميمشيش دلوقتى عشان يعدل الدستور
لو انت معارض استمرار المظاهرات لاسباب عدم انهيار اقتصاد مصر او العطلة او الفتنة او التدخل الاجبنى هتلاقى كل واحدة من دول موجودة فى الموضوع اقراها ورد عليها
5
وبعدين انا هسالك شوية اسالة واضحة ومحددة جدا ومستنى ردك على كل سؤال فيها
اولا انت مسامح مبارك فى دم ال 300 شهيد والاف الجرحى هل هتسامحه داخليا وترضى انه يمشى سواء حاليا او بعد 6 شهور من غير حكم سيبك من نقطة انه فيه الاف قتلى نتيجة لحرب مستقبلية فى وجهة نظرك ده كلام جدلى وتوقع ضعيف جدا جدا جدا زى مانا اثبتلك ومش منطق صحيح انه عدم محاسبة الجانى عشان حاجات لسه محصلتش وتوقعها ضعيف جدا اصلا
فكر كويس اوى قبل متجاوب
ثانيا انت مسامح مبارك فى 70 مليار دولار سارقهم من فلوس الشعب على مدار 30 سنة وانه يخلع بيهم رغم انه ادى لانهيار الاقتصاد المصرى وانا ذاكر ارقام ديون مصر الخارجية فى عصره بقت اد ايه وكمان خلى نص الشعب تحت مستوى الفقر
ثالثا انت حتى لو مقتنع ان الحكومة دى هتنفذ وعودها وهتعمل الاصلاحات همشى معاك طب ماهو لو الحكومة دى عملت انتخابات نزيهة فى شهر 9 يبقى كده برضه الاخوان ممكن يمسكو الحكم على حسب منطقك وخوفك يبقى بالنسبة لريك مفروض مبارك هو اللى يستمر او ابنه او حد من الحزب
رابعا على حسب منطقك الغريب انك خايف من الاخوان او اى جماعة اسلامية انها تمسك الحكم انك كده مؤيد استمرار نظام ديكتاتورى بيسرق شعبه وخلاه عاطل وبوظ الاقتصاد وبيعتقل فى الشعب على حدوث ثورة على النظام الفاسد ده

اللى بيحرمو الخروج على الحاكم والفتنة

فيه نقطتين مهمتين
اولا طب وشيوخ الازهر اللى نزلو ميدان التحرير دول والشيخ محمد رفاعة الطهطاوى المتحدث الرسمى باسم الازهر دول مبيفهموش فى الدين دى حاجات فقهية اتركها لاهل الدين وعليها اختلاف وفيه عارضو وفيه ايدو والشيخ محمد حسان ذكر فى حديث تلفزيونى له انه مادام هذه ارادة الشعب فعلى مبارك ان يرحل ولم يذكر انه علينا فض الاعتصام
ثانيا معنى كلامك ان ثورة 1952 ضد الملكية كانت غلط
وثورة 1919 ضد الاحتلال كانت غلط
ولو فيه دولة احتلت مصر عسكريا مينفعش اننا نعمل ثورة عليها عشان نتجنب الفتنة


اللى خايفين من الفوضى بعد سقوط النظام زى تونس

بالنسبة لمسالة تونس تونس غير مصر تونس ليها نظامها ليها قوانينها ليها طبائع شعبها ليها دستورها اجواء النظام والحياة مختلفة تماما عن مصر
فيه حاجة كمان مينفعش تحكم فشل ثورة او عدم استمرارها فى دولة بفشلها فى دولة اخرى كلام مش منطقى الصراحة
تونس على فكرة بن على كان بيحاول يحولها لدولة علمانية وملهاش اى دعوة بالنظام الداخلى لمصر والا بكده انك تقارن مستقبل تونس بمستقبل ايران بعد ثورة ايران على الشاه واتجاههم للشيعية والتطرف
طب مانت عندك الجزاير لما يحصل فيها مظاهرات ممكن يموت الاف لوجود جماعات مسلحة كتيرة ونظام الدولة نفسه مش عارف يسيطر عليهم كل دولة وليها نظامها الداخلى وليها خطواتها فى الثورة وطريقتها وحلولها لمشاكل الثورة
معنى كلامك ان تونس لما وقعت النظام وحصل فوضى ولما مصر وثقت فى النظام انه هيصلح وهيرحل ومنفذش وعوده مثلا يبقى معنى كده ان مفروض الجزائريين انهم ميعملوش ثورة خالص لان كده كده لو النظام سقط او وعدهم بوعود فى الحالتين الثورة ممكن تفشل وتحصل فوضى فى البلاد
مكنش مثلا لما احنا عملنا ثورة 1919 بصينا على خطوات تحرك ثورة الهند ضد الانجليز او لما تحصل اى ثورة شعبية فى العالم انها قعدت تبص على خطوات الثورات المجاورة وشافت هما وصلو لايه وبعدين تراجعو عن اكمال الثورة


اللى خايف ان الجيش ينقلب ويمسك الحكم لو الرئيس مشى

حل النقطة بتاعة مين اللى هيمسك الحكم فيه حل منطقى وتبعا للدستور نفسه ان رئيس المحكمة الدستورية العليا هو هيبقى الرئيس والترتيب المنطقى فى الحل التانى بتاع نقطة ان اللى بيقول ان مبارك ميمشيش عشان يعدل الدستور هتلاقى الخطوات المنطقية وكلها من داخل الدستور لاننا طبعا مش هنلغى الدستور والدستور هيدينه مطبق مش معنى اننا عملنا الثورة اننا نلغى الدستور احنا عايزين تعديل بضع نقط فيه بس
ومتخافش من الاحزاب السياسية ولا الاخوان كلها بانت انها ضعيفة جدا جدا وملهاش اى كلمة ولا صوت ولما راحو اتفاوضو مع عمر سليمان يوم الاحد الشعب استمر فى مظاهرات مليونية فى نفس اليوم واعترضو على الاقتراحات بتاعة عمر سليمان والاحزاب والاخوان
بالنسبة للجيش نفسه انه يخرق الدستور ويخلع رئيس المحكمة الدستورية وده احتمال صعب جدا بصراحة انا هقولك بصراحة دى النقطة الوحيدة اللى قلقانى حبة بس مش قلقانى لما الرئيس يمشى بس قلقانى حتى لو انت عايزة يمشى فى شهر 9 الجيش ممكن يعمل اى انقلاب اصلا على نظام الحكم فى اى لحظة مجرد اتفاق قواد الجيش على الانقلاب يعنى حتى مش دلوقتى او فى شهر 9 ده ممكن حتى بعد سنة او اتنين او ثلاثة اى لحظة ممكن يحصل انقلاب من الجيش ودون رغبة الشعب سواء فى حالة استقرار او مظاهرات
بس انا هبقى صريح معاك احنا كل هدفنا حاليا اننا نسقط النظام العسكرى الفاسد الحالى ونعدل الدستور دى اهم حاجة مش معنى كده ان اى نظام عسكرى هيبقى فاسد المهم ان الرئيس نفسه يبقى تحت السلطات ويبقى فيه رقابة عليه وفيه موافقة لمجلس الشعب ان الدولة متبقاش دولة فرد تبقى دولة قرار جماعى يعنى حتى لو الاخوان مسكو الحكم ورغم انى مش هدى صوتى شخصيا ليهم بس برضه مش هينفع انهم ينفذو قرارات من دماغهم ويعدلو الدستور ويعملو اى حاجة هتبقى فيه سيطرة ورقابة والهيئات هتبقى متداخلة مش قرار فرد ولا واحد ديكتاتور حاطط كل حاجة فى البلد فى ايديه
فهمتنى يعنى ملخص كلامى احنا بنعمل ثورة ضد النظام العسكرى الحالى والنظام العسكرى مش لازم ديما يبقى فاسد وبالنسبة لمين يمسك الحكم انا برضه معاك فى حكم مدنى زيك بالظبط بس ده رايى ورايك وهنشوف راى الشعب كله فى الانتخابات النزيهة تحت الرقابة الدولية وكلنا هنوافق ع الرئيس الجديد حتى لو عم حزمبل لانه المهم انه يبقى تحت الرقابة وهيتحاسب على كل خطوة بيعملها ومفيش اصلا اى رئيس جديد انه هيحاول انه يعمل او ينفذ قرار غضب عن الشعب لان زى مانت شايف نظام ديكتاتورى عسكرى صارم من 30 سنة وقعه حبة شباب ع النت كانو متفقين على يوم واماكن التجمع قبلها بعشر ايام


اللى بيقولو كفاية تشوية لمنظر مصر الحضارى

هو مش النظام ومعاونيه دول هما اللى قاموا بترهيب الصحفيين الاجانب والعرب ومنعهم من دخول ميدان التحرير يوم الخميس وتصدير كاميراتهم واعتقال البعض وضرب اخرين وخلو كل دول العالم تدين التصرف ده وبقى شكلنا فضحية
هو مش النظام ده هو الى دخل الجمال والاحصنة لميدان التحرير ورجع مصر للقرن ال 12
مين هو السبب فى المنظر الغير حضارى لمصر ادام العالم كله لما قطع خطوط الاتصالات والنت والطرق والمواصلات لفترات متفاوتة عشان يوقف التظاهرات ويحاول انه يمنع الصحفيين من نقل الجرايم والعنف اللى بيحصل ضد المتظاهرين ورجع مصر للقرن ال 19


كلام الاعلام عن ان الاحزاب والاخوان هما اللى بينظمو المظاهرات دلوقتى

 اولا بص عشان نبقى صرحا الاخوان والاحزاب بجد بداو يدخلو بس بشكل نسبى عشان هما لقو هبوط عزيمة وانخداع جزء من الشعب العاطفى المغلوب على امره او حتى لو لاطماع فى السلطة احنا بنتكلم دلوقتى على استمرار المظاهرات نفسها بس هل ممكن تجميع الاخوان لمليون متظاهر فى ميدان التحرير يوم الجمعة 4 فبراير والاحد 6 فبراير وطب ومظاهرات الاسكندرية والمحلة ودمنهور والاسماعيلية هى كلها قام بيها الاخوان ضد النظام وعندنا فى الزقازيق على سبيل المثال انا اشهد بنفسى على الاف بمعنى كلمة الالاف من مختلف الطبقات فى يوم الجمعة ده شارع رئيسى كامل مملوء عن اخره فى وسط المدينة وكلهم بيطالبو باسقاط الرئيس ازاى بقى ينظم الاخوان كل ده وغير كده حكم عقلك انت فى ميدان التحرير على الشاشات نفسها هتلاقى ناس من مختلف الاعمار ومن كل الطبقات وغير كده كمان بدا ينضم القضاة والمحامين والممثلين وشيوخ الازهر ليها عشان تزيدها قوة وشرعية
ثانيا فيه نقطة هامة جدا هو مش الاخوان المسلمين والاحزاب المعارضة دول جزء من شعب مصر هو لما يقوم الاخوان او الاحزاب بتنظيم مظاهرات هى كده متعتبرش مظاهرات ليها مطالب مشروعة هما مش الاخوان والاحزاب دول ناس مصريين ولا ناس من ماليزيا بجد حاجة كوميدية من الحكومة وهما بس عمالين يكررو الكلمة دى عشان يحسسونا بالخطر ويخوفو امريكا من تغيير النظام
بص انت ع الشاشات او الكاميرات اللى بين الناس وانت هتعرف ان مابينهم العمال والفلاحين والصحفيين والمحامين وشويخ الازهر والطلاب والبنات والقبطيين وكفاية قداس يوم الاحد
ده غير كده اسال نفسك سؤال لو الميدان زى مانت فاكر مليان احزاب وبس ليه لما الاحزاب كلها راحت اتفقت مع عمر سليمان ليه امبارح حصلت استمرار لمظاهرات مليونية او حتى 200 الف عشان متقفليش ع الرقم ومش فى القاهرة بس فى مدن تانية وهيستمر بكرة والجمعة ان شاء الله واعلن الشباب رفضهم للاجتماع لانه مبيمثلهمش يبقى ازاى كده كان كل المتظاهرين احزاب اعقل الكلام بعقلك انت


كلام الاعلام عن تآمر امريكا واسرائيل وايران وحزب الله مع المتظاهرين فى ميدان التحرير

والتعليق انت مصدق بذمتك الكلام ده ازاى تجتمع امريكا واسرائيل مع ايران وحزب الله هو احنا اطفال عشان نصدق ده
ايه هى مصلحة امريكا واسرائيل فى تنظيم التظاهرات اسرائيل نفسها هى اكبر متضرر من تغيير النظام فى مصر ورئيس الوزراء الاسرائيلى نفسه نتانياهو كل يوم بيخرج بنفسه ويقول انا اخشى على حليفنا مبارك واخشى على معاهدة السلام بيننا واخشى على العلاقات المشتركة بين مصر واسرائيل وكلنا عارفين طبعا تصدير الغاز بربع ثمنه وامريكا نفسها صرحت ان مبارك هو اكبر حليف لها فى الشرق الاوسط
واظن كفاية اوى النكتة بتاعة التلفزيون المصرى لفتاة من المتظاهرين وقالت اننا متدربين على يد الموساد الاسرائيلى بس بعدها خرج علينا الكاتب الكبير بلال فضل وقال انها صحفية فاشلة فى صحيفة صغيرة هو عارفها وهى مشهورة بالافتكاسات فى الاخبار وعرفنا بعدها انها اسمها الصحفية نجاة عبد الرحمن
وكمان ازاى ايران تعمل مسيرة من مليون او حتى ربعهم شخص داخل مصر ازاى تقوم ايران او حزب الله بتنظيم مظاهرات فى معظم المدن المصرية فى يوم واحد والسؤال مطروح عليك انت عشان تعقله بنفسك

  
كلام ناس عن تآمر قطر والجزيرة ضد مصر

اللى اتنشر من وثائق بين قطر واسرائيل لزعزعة استقرار مصر ممكن يكون حصل كاساليب تانية لان اسرائيل مش مستفيدة من سقوط نظام مبارك وكمان مش ممكن يكون ليهم دخل فى المظاهرات الحالية لانها ثورة شبابية من داخل الشباب منغير ميول سياسية ولا دينية وهى حاجة مش منطقية خالص وقطر نفسها مش ممكن حتى اتهامها باعمال البلطجة نفسها لانها دى كلها اعمال داخلية منظمة عن طريق مسؤلى الامن والحزب زى ماتم التحقق من بطاقات شرطيين وكمان اعتراف البلطجية بانهم خدو رشاوى فى التلفزيون
بالنسبة لقناة الجزيرة انا على فكرة مش مع الجزيرة كلنا عارفين ان الجزيرة ليها تلات عيوب رئيسية
اولا انها بتضخم فى الارقام للمتظاهرين والاصابات حتى من المراسلين بتوعها نفسهم دى حاجة
تانيا انها بتعتمد على مجرد شهود عيان فى الشارع كاخبار ليها
ثالثا انها بتنقل من طرف واحد بس وهو طرف المتظاهرين بس ومبتجبش اى حد من الطرف التانى

لكن ليها مزايا كبيرة
افضل تغطية للمظاهرة نفسها بس مش للظروف الكلية حول المظاهرة لانها مش محايدة وبتنقل من طرف المتظاهرين بس
اجرا قناة بتذيع فيديوهات كل فيديوهات القتل بدم بارد ودهس المواطنين هى اللى بتذعيها ده غير النقل المباشر لاجحام المظاهرات ومش مجرد صور من تحت مش بتبين احجام المظاهرات الكبيرة
القناة الوحيدة اللى بتجيب اصابات المتظاهرين من داخل الشارع وبتجرى حوارات على الهوا معاهم
افضل قناة بتنقل اراء العالم الخارجى ودول العالم ومنظمات حقوق الانسان وهى اول قناة ذاعت البحث اللى عملته صحيفة جارديان الانجليزية عن ثروة مبارك وعائلته
بس عموما دى مش نقطة خلافنا ان القناة محايدة ولا لا
لكن الكلام عن ان موقع القناة هو اللى كتب بنفسه معا لاسقاط مصر ومش هاكرز دى كوميديا عاملة زى اللى يسرق ويكتب على وشه انا حرامى


يبقى كلنا لازم نصمد وننزل ونساند بعض

ياشباب النظام بدا يسقط بالفعل وفيه تنازلات رغم انها كلامية بس الاوراق بتاعته بتقع بجد ومفاضلش غير سقوط الرئيس نفسه والنبى اصمدوا واستمرو
ثورة ايران عشان توقع الشاه اللى حكم ايران لمدة 40 سنة استمرت المظاهرات لمدة عام كامل انا مليش دعوة بايران نفسها ولا ثقافتها ولا ليا دعوة بنظامها الشيعى انا بتكلم عن اصرار الناس لاسقاط نظام ديكتاتورى تم ازاى مش الناس راحت احتجت يومين وبعدين قالت خلاص كفاية كده عايزين نروح الجامعات والقهاوى تانى
ياجماعة الحرية والديمقراطية تمنها غالى غالى بجد انا مش بدعو لنظام اخوانى ولا حزبى ولا مع حد بس لازم النظام كله يقع ونعدل احنا بنفسنا الدستور عشان يبقى النظام ديمقراطى حقيقى هيستمر لمدة 200 او 300 سنة جايين
البلد بتتغير وبنكتب تاريخ جديد لمصر محدش هيحس بعظمته الا الاجيال الجاية كمان 100 سنة واحنا بنحاول نوقع اكبر نظام وطغيان ديكتاتورى عسكرى فى المنطقة العربية كلها ومش سهل ابدا ولازم نصبر


وفى نهاية مقدرش الا انى استشهد بمقولة شهيرة للشيخ الغزالى





فإذا احتدمت المعركة بين الحق والباطل حتى بلغت ذروتها، وقذف كل فريق بآخر ما لديه ليكسبها، فهناك ساعة حرجة يبلغ الباطل فيها ذروة قوته، ويبلغ الحق فيها أقصى محنته، والثبات في هذه الساعة الشديدة هو نقطة التحول، والامتحان الحاسم لإيمان المؤمنين سيبدأ عندها، فإذا ثبت تحول كل شئ عندها لمصلحته، وهنا يبدأ الحق طريقة صاعداً، ويبدأ الباطل طريقه نازلاً، وتقرر باسم الله النهاية المرتقبة
بس ربنا هو القادر على كسر الظالم زى مقولة الشيخ الغزالى وهضربلك مثل لما تلاقى حرامى بيستجوبوه وبيحاولو يقرروه وهو ثابت وصامد وبعدين من طول المدة فجاة بينهار لوحده وده اللى هيحصل لمبارك باذن الله تعالى واخر كلام للشيخ الشعراوى للتلفزيون قال مفيش معركة بين حق وباطل بتطول لان ديما الباطل زهوق
انصرو كل الشباب فى ميدان التحرير ولو مش قادرين ع النزول حاولو تساندوهم ع الاقل وتوعو باقى الشباب واعلمو ان نصر الله قريب وهو قادر على اخذ كل ظالم اخذ عزيز مقتدر


رايى الخاص فى الحكم العسكرى لمصر

وكلنا عارفين قادة الجيش انهم لازم كلهم يبقو واصلين وازاى بيوصلو لمناصبهم سواء الجيش او الشرطة ومتضحكش على نفسك وتقول لا دول طيبين وقلبهم رقيق وغلابا وقريبين من الشعب
انا مش بقلل من قادة الجيش كلهم ليه تاريخه وليه عظمته وليه مكانته ولكن داخل الجيش وليس فرضا ع الشعب المصرى فى قوانينه المدنية والقضائية والاجتماعية والتعليمية
الحكم المدنى بيبقى قريب من الشعب اكتر وبيحس بمطالبه احسن من الحكم العسكرى اللى بيمسك الشعب بالقوة
كل القادة والاساطير اللى ذكرتهم انا بعترف بعظمة حكمهم بس ده عصر وده عصر وانت نفسك شوفت حكم مبارك القائد العسكرى عامل ازاى
الجيش ليه منى كل احترام وتقدير بس دوره فى حماية البلد مش حكم الشعب الجيش نظام صعب وصارم وصعب يتطبق اى مبادئه فى الحكم ع الشعب وانا لما بقول الحكم المدنى هو معنى كده انى بلغى الجيش الجيش موجود وقادة الجيش موجودين ووزير الدفاع يبقى اقوى قائد للجيش طبعا ولكن مهام الرئيس بتبقى معظمهما مع شعبه والاهم كمان علاقاته الخارجية مع الدول الخارجية لكن مش خبرته الحربية والاستراتيجية


رد مقتبس : بخصوص الاقاويل اللي بيرددها عمر سليمان من حين لاخر عن ضرورة خروج مبارك من السلطه علي طريقة خروج العظماء لانه أحد ابطال حرب اكتوبر 

أوكيه..حسني مبارك قام بدوره علي اكمل وجه في حرب اكتوبر  وكان  ابان الحرب اللواء محمد حسني مبارك  قائد القوات الجويه والراجل نفذ دور  سلاح الطيران كما رسمت خطة المآذن العاليه التي وضعها الفريق سعد الدين الشاذلي منذ توليه رئاسة الأركان سنة 1971 ومن المعلوم في العقيده العسكريه إن رئيس الأركان هو بمثابة المخطط الرئيسي علي أرض الواقع وهوا القائد المهني التكتيكي للجيوش لأن منصب وزير الدفاع هو في المقام الاول منصب سياسي .اللي خدموا في الجيش يعلموا هذا جيدا  
مبارك ادي دوره بامتياز  مثلما ادي كل قيادات الجيش دورهم بامتياز ايضا  وكلهم دون اصغر جندي استشهد في الحرب
ولكن السوءال الان هل هذه الحرب كانت   الضربه الجويه  فقط ؟  
دأبت الأله الاعلاميه المصريه علي تصوير الحرب وكأنها كانت الضربه الجويه اولا وللأبد ثم دور باقي قوات الجيش  وهذا اهانه للشهداء و الجيش كله  
ثانيا: ممكن بعد اذنكم حد يرد عليا ويقولي كام واحد من الناس اللي حاربت في 73 سواء قاده كبار أو صغار أو حتى ضباط  أو جنود عاديين ماتوا بعد ذلك ولم يذكرهم علي مدي السنين  التلفزيون أو حتى اذاعة نجوم إف إم  ..؟  
ثالثا: كلنا عارفين إن الفريق سعد الشاذلي كان رئيس الأركان  وكان علي خلاف شخصي مع الرئيس السادات والمشير احمد اسماعيل  بداية من يوم 14 أكتوبر لأن الشاذلي رفض تنفيذ أمر السادات بتطوير الهجوم  ولكن السادات رحمه الله اصر علي التنفيذ  فتكبد الجيش المصري خسائر وصلت 250 دبابه وخسائر بشريه اكثر من نصف ماخسره الجيش في اجمالي الحرب كلها في مقابل  إن إسرائيل  خسرت 11 دبابه فقط  واثبتت الايام صدق وجهة نظر الشاذلي فيما يخص ثغرة الدفرسوار  ولا اريد ان اقول كذب السادات ولكن سوء نظرته وفرضه للخيارات العسكريه الخاطئه   
وتمت اقالة الفريق الشاذلي من منصبه  لأن السادات تبين له صدق خيارات الشاذلي وحنكته  فلم يعد يطيق وجوده في قيادة الجيش  وحذف اسم الشاذلي من قائمة الشرف العسكريه ومن احتفالات اكتوبر  ( شوفتوا افترا أكتر من كده
الغريب في الأمر إن الخلاف بين الشاذلي والسادات لم يقف عند هذا بل إن السادات أحال الشاذلي للمحاكمه بعد تقديم الشاذلي  ببلاغ للنائب العام  يتهم السادات بأضرار عن عمد وصلف بالجيش ابان حرب اكتوبر والذي ادي الي محاصرة الجيش التالت الميداني كله  
التحكم علي الشاذلي بـ 3 سنين سجن وهوا منفي في الجزائر لمدة 14 سنه  ..ولما السادات مات رجع الشاذلي لمصر سنة 1992 بعدما شارف علي السبعين من عمره  حتى يموت علي تراب مصر ( كما يردد مبارك اليوم) ولكن بأوامر من مبارك تم تنفيذ الحكم علي عبقري حرب 73 ومخططها من الالف للياء علي الرغم من ان القانون المصري يلغي أي حكم صدر غيابي بعد عودة المتهم الي مصر ويستوجب محاكمه جديده ..
وقضي الشاذلي 3 سنوات في السجن علي رغم إن بعد المحامين نجحوا في الحصول علي حكم براءه من المحكمه  ولكن بأوامر مبارك لم يتم الالتفات اللي حكم المحكمه  وسجن الشاذلي  وهو يبلغ من العمر 73 سنه

تم النشر فى تاريخ
on Monday, February 7, 2011 at 2:53pm

احمد عاطف


ليست هناك تعليقات:

إرسال تعليق