الاثنين، 22 أبريل 2013

فى دولة اللا قانون .. "جماعة محظورة" فى عهد الجماعة المحظورة ..




مقتطفات من قضية " جماعة محظورة " فى عهد الجماعة المحظورة 




- فجر يوم الجمعة 19 ابريل .. قامت المباحث والامن الوطنى باختطاف بعض الشباب من منازلهم من اجمالى 22 صدر لهم امر ضبط واحضار باوامر النائب العام بتهم تاسيس وتمويل والانتماء الى جماعة محظورة تهدف الى العنف والارهاب " البلاك بلوك .. الشباب المقبوض عليهم بتهم البلاك بلوك كلهم فى محضر واحد.. برقم حصر تحقيق 6 مكتب فنى النائب العام لسنة 2013 .. وحققت معاهم نيابة واحدة هى نيابة امن الدولة العليا .. وهنا اسامى الـ 7 شباب معتقلين فجر الجمعة :

1- يوسف على عبد الرحمن 20س " جو الاسطورة " عين شمس .. احتجز بقسم عين شمس ثم اترحل مبدئيا لسجن طره تحقيق ..
2- عبد الرحمن محسن رزق " مانو " 18س .. احتجز بقسم الدقى ثم نقل لمكان غير معلوم ..
3- عبد الرحمن سليم محمود 23س مدينة السلام .. احتجز بقسم السلام ثم نقل لمكان غير معلوم ..
4- صلاح الدين على احمد اسماعيل 29س دار السلام .. احتجز بقسم دار السلام ثم نقل مبدئيا لمديرية امن القاهرة ..
5- محمد عادل محمد عيد 21س الاسماعيلية .. احتجز بسجن المستقبل بالاسماعيلية ثم رحل مبدئيا لمديرية امن القاهرة ..
6- عبد الرحمن محمد عبد الودود "العربى" 16س المطرية .. احتجز بقسم المطرية ثم اترحل مبدئيا لسجن طره تحقيق ..
7- اسلام محمود فولى ابو الحسن 23س .. مكانه غير معلوم ..

*** التطور هنا عند الداخلية وهما بيعتقلو الشباب من بيوتهم الفجرية .. انهم بياخدوا " اللابتوبات " يحرزوها وتنتقل للمباحث تدور فى شات الفيس وتويتر عن متهمين جدد .. !!



*** التخبط فى التحقيقات الاولى بالنيابات الجزئية ***


1- اولا .. نيابة مدينة السلام بمحكمة التجمع الخامس رفضت يوم الجمعة التحقيق مع عبد الرحمن سليم احد الشباب المتهمين بالانتماء الى البلاك بلوك .. بسبب عدم الاختصاص لان مفيش اوراق وصلتها او امر انتداب وتكليف من مكتب النائب العام التابع له المحضر .. ورجعوه تانى .. !!

2- ثانيا .. عبد الرحمن محمد عبد الودود 16س من المطرية اتقبض عليه من بيته فجر الجمعة..  ونزل للتحقيق معاه بعد صلاة الجمعة فى نيابة المطرية بمحكمة التجمع ورحلوه تانى .. وكيل نيابة المطرية رفض التحقيق معاه وقال انه ملوش اختصاص فى القضية لانها تبع مكتب فنى نائب عام.. عبد الرحمن محمد خد عرض باكر وهيتعرض بكرة الصبح بدار القضاء .. ده كان نقلا عن والده اللى خد القرار من وكيل نيابة المطرية .. والمحامين بيقولو مفروض عرض كله بالتجمع الخامس من الناحية القضائية والتامينية .. !!
 
3- ثالثا .. فيه ظابط ترحيلات بمحكمة التجمع الخامس عرفنا منه بالعافية ان عبد الرحمن محسن مانو جه محكمة التجمع قبلها ساعتين ومشوه بدون تحقيق .. !!

4- رابعا .. نيابة دار السلام بمحكمة زينهم رفضت التحقيق مع صلاح الدين على احمد يوم الجمعة لعدم الاختصاص .. !!



*** اقسام نيابات سجون .. فى دولة اللا قانون ***


1- اجراءات احتجاز الشباب المتهمين ببلاك بلوك باطلة وفق الدستور .. ازاى اتحقق معاهم السبت بعد مرور 24 ساعة على احتجازهم من فجر الجمعة بلا تحقيق .. !!

2- بعد يوم ونص من احتجاز مجموعة بتهم بلاك بلوك .. مكناش عارفين نوصل لمحاضر او تهم او تحقيقات او اسماء المحتجزين او اماكنهم .. ويقولك دستور وقانون .. !!

3- عبد الرحمن سليم احد المعتقلين اترحل يوم الجمعة العصر من محكمة التجمع الخامس واهله جريو بعربية وراه .. فيه ظابط تبع الترحيلات وقفهم على الطريق الدائرى وخدو بطايقهم .. وقالهم " مش من حقكو تعرفو مكانه " .. وكدروا اهله فى قسم القاهرة الجديدة شوية ومشوهم ..

4- المحامين لفوا يوم الجمعة على محاكم التجمع ومدينة نصر ومصر الجديدة واقسام الدقى وعين شمس ومدينة السلام ودار السلام .. النيابات الجزئية نفسها رفضت التحقيق .. وظباط الاقسام ميعرفوش الشباب راحو على فين لانهم تبع الامن العام ..

5- فيه اتنين عرفنا بمعجزة انهم راحو مديرية امن القاهرة يوم الجمعة والظباط هناك متكتمين جدا .. واتنين راحو طره .. والباقى محدش يعرف مكانه سواء قسم او نيابة ..

6- اتنين معتقلين جم النيابة بمحكمة التجمع الخامس بعد صلاة الجمعة على طول بدون علم محامين .. وواحد جه واترحل بسرعة بعد ربع ساعة من وصوله والنيابة رفضت تحقق .. والباقى مجاش .. 

  7- النيابة نفسها ممكن تحقق فى اى وقت حتى الفجرية وبدون محامين .. وممكن تحقق كمان باى مكان حتى لو جوه السجن او مديرية الامن .. هنعمل ايه مفيش قانون .. اذا كان النيابة بجلالة قدرها راحت تحقق مع معتقلين باحداث ذكرى الثورة جوه معسكر السلام اللى هو نفسه مكان احتجاز غير قانونى .. !! هتستنى ايه ..

8- بل والاغرب ان بقى " طبيعى " الفترة الماضية ان تتولى التحقيق مع اى معتقلين نيابة امن الدولة العليا او نيابة حماية  - لا مؤاخذة - الثورة دون وجه حق .. نيابة امن الدولة العليا تولت التحقيق كذا مرة الفترة الاخيرة اما بوكلائها او نيابة عادية بتاخد اختصاصها .. زى مرة فى فض التحرير .. ونيابة امن الدولة حققت برضه مع ال19 شاب جوه معسكر السلام المتفقلهم تهم قتل المتظاهرين خلال احداث ذكرى الثورة .. وبتدى حبس 15 يوم على طول .. نيابة حماية – لا مؤاخذة - الثورة ظهرت مؤخرا ملهاش وكلاء محددين لكن النائب العام بيمنح اى نيابة سلطة قاضى تحقيق او غرفة مشورة .. بامكانهم حبس 15 يوم او 45 يوم من اول مرة .. نيابة حماية – لا مؤاخذة - الثورة مبتظهرش على ورق تحقيقات النيابة .. لكن هى حققت قبل كده مع معتقلى قصر القبة يوم 15 فبراير .. ومع معتقلى دار القضاء يوم 6 ابريل .. 
 

*** التضارب فى مواعيد عرض المعتقلين على النيابة ***


- كل الاحتمالات كانت مفتوحة الجمعة ليلا بعد يوم كامل من الاحتجاز فى بلد مفيهاش قانون .. مجموعة الشباب المتهمين بالبلاك بلوك كانوا ممكن يتعرضو الصبح على التجمع او ممكن التحقيق الفجر بالتجمع او يحصل تحقيق جوه الحبس نفسه .. !! 
 
- اخر ما كنا قد توصلنا اليه الجمعة ليلا .. كلام شبه مؤكد ان المجموعة الممسوكة بتهمة البلاك بلوك هتتعرض الاحد على نيابة حماية الثورة بالتجمع الخامس.. وفى الغالب مفيش تحقيق بكرة .. المجموعة المتهمة بالبلاك بلوك "غالبا" تم انتداب وكلاء نيابة ليهم داخل سجن طره على الورق كانهم خدو حبس 4 ايام.. وبعدين ينزلوهم الاحد .. المحامين بيدعو كل الناس للحشد والضغط بكرة الساعة 10ص عند مكتب النائب العام بدار القضاء.. عشان يقدمو بلاغ باحتجاز بدون وجه حق ومعاد التحقيق .. قضية الشباب المتهمين ببلاك بلوك تبع مكتب فنى نائب عام وعندهم كل البيانات والتحقيقات.. ونيابتين المطرية ومدينة السلام رفضو التحقيق فيها .. ولو فرضا هيتتحقق معاهم بكرة فى التجمع وده صعب لانه هيكون مر يومين على احتجازهم .. بس هنكون عرفنا التفاصيل كلها من مكتب النائب العام وروحنا .. الكلام هنا نقلا عن محامين حقوقيين المتابعين لقضية البلاك بلوك..  واتفقو على عمل بلاغ عن احتجازهم دون وجه حق بلا تحقيق ودون معرفة مكانهم ..

*** التشتت عند مدير مكتب النائب العام المساعد بدار القضاء ***

- صباح السبت مدير مكتب النائب العام المساعد بنفسه مكنش يعرف التحقيقات التابعة لمكتبه الفنى امتى او فين او كام متهم فيها بعد يوم ونص من احتجاز الشباب .. مدير مكتب النائب العام المساعد بدار القضاء قال للمحامين لسه هيشوف الشباب المتهمين بالبلاك بلوك هيتعرضو فين وامتى .. ويرد بعد نص ساعة  .. !! ومعرفش يحدد وقتها لانه مكنش عنده معلومات لسه الا بعد ماعمل شوية اتصالات , وعرف ان التحقيق معاهم هيبقى فى نفس اليوم - السبت - فى نيابة امن الدولة بالتجمع .. !!


*** الشحن والتحفز عند ظباط تامين محكمة التجمع الخامس ***


- يوم السبت حصلت خناقة الصبح امام محكمة التجمع الخامس بين محمد عواد وظباط تامين المحكمة راحوا مسكوه سحلوه على الارض وقطعوا هدومه وخدوه جوه وسحبو مينا السلفى معاه .. محمد عواد الهتيف ومينا السلفى المحتجزين جوه محكمة التجمع الخامس اتعملهم محضر بتهم مقاومة السلطات .. بعد سحل 5 ظباط لعواد وتقطيع هدومه .. وبعدها اترحلوا من محكمة التجمع وراحو قسم القاهرة الجديدة اول .. والمحامين عملوا محضر لاثبات اصاباتهم .. ووفقا لحرس وظباط بمحكمة التجمع محمد عواد ومينا السلفى راحوا مديرية الامن ليلتها .. وتحقيق النيابة معاهم كان تانى يوم بنيابة القاهرة الجديدة اول بمحكمة التجمع الخامس ..

- حصلت خناقة كبيرة السبت ليلا امام محكمة التجمع الخامس .. فيه مجموعة ظباط خرجو بعد مالجو هدى واستقصدو واحد من الشباب وكلبشوه وكانو عايزين يسحبوه جوه .. الظباط قالوله " مش انت اللى كنت بتشتم احنا هنعملها محضر دلوقتى " .. وكانو ساحبينه لجوه لولا الشباب الموجودين عملو خناقة كبيرة مع الحرس وطلعوه .. وقت الخناقة دى الظباط رحلوا الـ 8 معتقلين بلاك بلوك من محكمة التجمع فى سرية بعد ماسربوا للناس كلها انهم خرجو من باب خلفى وافتعلو خناقة عشان يطلعوهم ..

*** مهازل فى اجراءات وتحقيقات نيابة امن الدولة ***

- قضية بلاك بلوك حصل فيها مهازل يوم الثلاثاء من نيابة امن الدولة سواء اجراءات او تحقيقات.. شكرا بجد للمحامين اللى صمدو عشان حق المعتقلين ولسه مروحين ..

1- اولا نيابة امن الدولة عشان تمشى موضوع عرض معتقلى بلاك بلوك بعد 36 ساعة من احتجازهم.. راحو عملو ع الورق انهم نزلو النيابة الجمعة 10 الصبح .. واعتبرو ع الورق نيابة امن الدولة الجمعة ادتهم عرض باكر فنزلو السبت .. وده محصلش لان فيه 3 اتعرضو نيابة جزئية ورفضوهم والباقى لم يعرض اصلا .. والمحامين النهاردة طلبو خلال التحقيقات .. الاستعلام عن مكان تواجدهم وخط سيرهم منذ القبض عليهم فجر الجمعة حتى مثولهم للتحقيق السبت ..

2- ثانيا منذ التحقيق فى قضية بلاك بلوك والمحامين لم يتمكنو من الحصول على المحضر او التحريات او اى ورق يخص القضية .. والمحامين اثبتو ده فى التحقيق ..

3- ثالثا نيابة امن الدولة تتعمد مط التحقيقات لاستمرار حبس الشباب دون اى جديد بالقضية .. خاصة بعد ورود تحريات المخابرات وادارة المعلومات الهشة .. تحريات الامن القومى التابع للمخابرات ذكر اسم 3 مؤسسين للبلاك بلوك فقط .. لكنه اكد انه لم يتوصل الى ادمنز الصفحة او ماهية تنظيم البلاك بلوك .. وتحريات المخابرات مذكرش كلمة عن المحتجزين .. اما تحريات ادارة المعلومات والتوثيق بالداخلية لم تضف جديدا وهى نفس تحريات الامن الوطنى .. اليوم فى استكمال التحقيق مكنش فيه اى جديد او تهم اخرى .. وكيل النيابة وصل لمرحلة بيسال المعتقل عن حالته الاجتماعية وعلاقته بالنت والكورة ..


4- رابعا النيابة اثناء التحقيق مع الاخير محمد عادل عيد .. قررت التوقف عن استكمال التحقيق بسبب انسحاب قوات تامين المحكمة اللى منسحبوش اصلا .. واتسجل فى التحقيق السبب انصراف الحرس .. والمحامين حطوا ارقامهم فى ورق عند النيابة عشان يبقوا يكلموهم لما يحددوا يوم تالت كمان ي
جيبوا المتهمين فيه عشان استكمال التحقيق .. !! ولما تم اكتشاف وجود قوات التامين فى المحكمة بعد ترحيل المعتقلين .. ظباط التامين ومساعد وزير الداخلية لقطاع شرق عملو مذكرة ضد النيابة .. والمحامين عملو مذكرة اخرى ضد النيابة .. واتضم المذكرتين فى محضر واحد 2119 ادارى قاهرة جديدة اول .. وكده اتعلم على نيابة امن الدولة العليا .. نيابة امن الدولة اصبحت خصم فى قضية بلاك بلوك بعد المحضر .. اى اجراء تتخذه ممكن ابطاله .. حتى هينزلو المعتقلين تجديد قبل معادهم ..


5- بلاغ برقم 7 لسنة 2013 عرائض امن الدولة .. قدمته المحامية بجبهة الدفاع عن متظاهرى مصر أ. سيدة قنديل الى محامى عام نيابات امن الدولة .. للمطالبة بالتحقيق مع قيادات جماعة الاخوان وعلى راسهم مرسى والنائب العام الغير شرعى بتهمة الانتماء الى جماعة محظورة ..
https://www.facebook.com/permalink.php?story_fbid=508775952503084&id=100001120519409


*** التعسف داخل سجون طره ***

- جو والمعتقلين بيعانو من معاملة سيئة واهانات بسجن العقرب اخر يومين .. وبيقفلو عليهم النور ومبيدخلوش اكل ومانعين دخول الحمام ..

- شهادة كاملة من المعتقلين والتعسف وسوء المعاملة داخل السجن ..

https://www.facebook.com/notes/shero-badr/%D8%B4%D9%87%D8%A7%D8%AF%D9%87-%D8%A7%D9%84%D8%B9%D9%8A%D8%A7%D9%84-%D8%A7%D9%84%D8%AC%D8%A7%D9%85%D8%AF%D9%8A%D9%86-%D8%A7%D9%84%D9%84%D9%89-%D9%85%D9%85%D8%B3%D9%88%D9%83-%D8%A8%D8%AA%D9%87%D9%85%D9%87-%D9%85%D9%86%D8%B8%D9%85%D9%87-%D8%A7%D9%84%D8%A8%D9%84%D8%A7%D9%83-%D8%A8%D9%84%D9%88%D9%83-%D9%88-%D8%B2%D9%88%D8%A7%D8%B1-%D8%A7%D9%84%D9%81%D8%AC%D8%B1-/608490739180100?ref=notif&notif_t=note_tag


*** اسماء الـ 22 مطلوبين ضبط واحضار بتهم بلاك بلوك من محضر التحريات نفسه ***

1- اسلام محمد حسن الجندى 24س
2- محمد عبد المعطى ابراهيم خليل 21س وشهرته محمد مصرى كابو
3- عبد الرحمن سليم محمود عبد الله 23س - معتقل – من مدينة السلام - سجن العقرب شديد الحراسة بطره
4- هانى عبد الحميد قمر
5- عبد الرحمن محسن رزق احمد "مانو" طالب معهد فنى -  معتقل – من الدقى – سجن طره استقبال
6- شريف اشرف حسب النبى الصيرفى - المحلة
7- مصطفى محمد عبد العال بغدادى- الهرم
8- عبد الرحمن محمد عبد الودود محمود العربى 16س طالب ثانوى - معتقل – من المطرية – قسم مدينة نصر ثان
9- كريم احمد محمد عبد الشاعر 31س وشهرته كريم الشاعر
10- اسلام محمد فولى ابو الحسن 23س طالب حقوق - معتقل – من 6 اكتوبر - سجن طره استقبال
11- احمد محمد احمد عيد عبد الغنى
12- محمد عادل محمد عيد 21س "جولدن" طالب خدمة اجتماعية - معتقل – من الاسماعيلية - سجن العقرب شديد الحراسة بطره
13- عمرو احمد عبد الفتاح 
14- محب الله احمد محمود البنا
15- يوسف على عبد الرحمن 20س "جو الاسطورة" طالب ثانوى - معتقل – من عين شمس - سجن العقرب شديد الحراسة بطره
16- محمد طارق محمد عطوة
17- محمود صفوت اسماعيل – معتقل – من مدينة السلام
18- صلاح الدين على احمد اسماعيل 29س فنى صيانة - معتقل – من دار السلام - سجن العقرب شديد الحراسة بطره
19- قاسم اشرف قاسم 20س - قام بتسليم نفسه - من القليوبية
20- احمد فتحى عمر المزين
21- شريف محمد عاطف حماد الحسينى
22- غير معلوم 

- خالد عبد ربه 23س طالب طب اعتقل فجر التلات من منزله فى 6 اكتوبر.. منزلش نيابة امن الدولة واسمه مش فى ضبط واحضار بلاك بلوك.. منعرفش عنه حاجة..

*** اسماء 3 شباب فى تحريات المخابرات ادعت انهم مؤسسى بلاك بلوك :

1- شريف اشرف حسب النبى الصيرفى
2- مصطفى محمد عبد العال بغدادى
3- محمد حسين زيدان


*** نبذة عن احد متهمى البلاك بلوك .. محمد عادل جولدن ..

https://www.facebook.com/photo.php?fbid=10152735558290244&set=a.325743950243.344202.291643655243&type=1&theater

*** شهادة اهالى ال8 معتقلين بتهم بلاك بلوك عن زوار الفجر ..

http://www.youtube.com/watch?v=uwiUT4WTQMc

*** شهادة اهالى عبد الرحمن سليم ومانو وعبد الرحمن العربى ومحمد عادل عيد معتقلين بتهم بلاك بلوك عن زوار الفجر ..

http://www.almasryalyoum.com/node/1669161

*** بلدنا بالمصرى .. جرائم ضد البلاك بلوك .. وما خفى كان اعظم ..

http://www.youtube.com/watch?v=o-sI1Wq-Ql4

*** تحقيقات نيابة امن الدولة ***


- اللى حقق يوم السبت مع الـ 8 معتقلين المتهمين ببلاك بلوك .. قضاة منتدبين من مكتب فنى نائب عام .. وهتتولى نيابة امن الدولة باقى التحقيقات ..
- السبت 20 ابريل اول ايام العرض قرار النيابة بالتجمع الخامس للـ 8 معتقلين بتهم البلاك بلوك حبسهم 15 يوم..  مع عرضهم يوم التلات القادم لاستكمال تحقيقات نيابة امن الدولة ..

- تحريات الامن الوطنى عن قضية البلاك بلوك بتثبت فى التحقيقات ان تم انشاء صفحة البلاك بلوك على الفيس سنة 2010.. يعنى قبل الثورة بسنة .. !!
- الثلاثاء 28 ابريل كانت جلسة تجديد الحبس الاولى وقررت نيابة امن الدولة بالتجمع الخامس للـ 8 معتقلين بتهم البلاك بلوك حبسهم 15 يوم..  مع عرضهم يوم التلات القادم لاستكمال تحقيقات نيابة امن الدولة ..- الـ 8 شباب المتهمين ببلاك بلوك جايبينلهم برنتات فيس بوك وصور اشتباكات مش باين فيها الملامح وشوية مكالمات غير واضحة الصوت .. وحاطينها فى التحريات ..

*** تحريات المخابرات العامة الهشة :

تحريات الامن القومى التابع للمخابرات ذكر اسم 3 مؤسسين للبلاك بلوك فقط .. لكنه اكد انه لم يتوصل الى ادمنز الصفحة او ماهية تنظيم البلاك بلوك .. وتحريات المخابرات مذكرش كلمة عن المحتجزين .. ذكر فقط ان مجموعة الكتلة الثورية السوداء أفكارها مستمدة من " تقاليع الشباب اليساري " في ألمانيا في الثمانينات .. 


*** تحريات ادارة المعلومات والتوثيق بالداخلية :

الإدارة العامة للتوثيق بوزارة الداخلية لم تضف جديدا وهى نفس تحريات الامن الوطنى .. وذكرت ان التنظيم يدار عبر صفحة على الفيس بها 484 مشترك .. !! تحت اسم الكتلة الثورية السوداء .. 

*** التهم الموجهة بالظبط للـ 8 معتقلين بنيابة امن الدولة بمحكمة التجمع :

1- الاشتراك فى جماعة محظورة "البلاك بلوك" بهدف الارهاب والعنف ..
2- ترويج لافكار واغراض جماعة بلاك بلوك باستخدام شبكات التواصل ..
3- استعمال القوة والعنف مع موظفين عموميين ..
4- حيازة اسلحة نارية وبيضاء بدون ترخيص ..
5- حرق مقر الاخوان بالتوفيقية .. وتهمة وضع النار عمدا بديوان عام محافظة دمياط موجهة فقط لعبد الرحمن محمد عبد الودود ..

*** جلسة الاستئناف بمحكمة شمال بالعباسية الخميس 2 مايو :

- الخميس 2 مايو كانت جلسة الاستئناف لل8 معتقلين كانت فى قاعة 5 بمحكمة شمال بالعباسية والقضاة اصرو تبقى سرية جوه غرفة المداولة .. وقافلين الباب من جوه ومانعين دخول نص المحامين اللى جايين يترافعوا ..
- قرار غرفة المشورة بمحكمة شمال بالعباسية .. رفض استئناف ال8 معتقلين بتهم بلاك بلوك .. وتاييد قرار استمرار حبسهم لمدة 15 يوم اخرى ..
- غرفة المشورة الموقرة بمحكمة شمال بالعباسية تم الضغط عليها فى قرارها الخاص بال8 متهمين ببلاك بلوك.. بعد اتصالات وتهديدات من نيابة امن الدولة .. نقاشات حادة حصلت بين وكلاء نيابة امن الدولة وقضاة الاستئناف جوه غرفة المداولة والوكلاء طلعو عملو اتصالات بناس كبيرة .. بعدها كان القرار 15 يوم .. !!
- المشكلة الكبيرة للاسف المتهم بيبقى ليه استئناف واحد فى الشهر.. يعنى لا قدر الله لو اتجددلهم تالث 15 يوم ملهمش استئناف الا فى التجديد الرابع


*** فى النهاية ***

- شكر واجب لكل محامين جبهة الدفاع عن متظاهرى مصر - التى تضم 31 منظمة حقوقية - والمحامين المتطوعين اللى اتبهدلوا وناضلوا بجد عشان الشباب المعتقلين دول او غيرهم وتمسكوا بكل حقوقهم ..
- وعلى راسهم .. سيدة قنديل ( مستقلة بجبهة الدفاع ) ومصطفى كمال ( حريات شمال نقابة المحامين ) ومحمد صبحى ( المركز العربى لاستقلال القضاء ) ومحمد فاروق ( الشبكة العربية ) وسماح عمار ( مؤسسة الطفل ) ومحمد بكير ( المبادرة المصرية ) ومحمد محمود ( الشبكة العربية ) واحمد عثمان ( هشام مبارك ) واسلام خليفة ( الحقانية ) وايمن مجدى ( مركز عقل ) و أ جابر نصار الفقيه الدستورى .. وايضا فادى وجدى ( مؤسسة الطفل ) على مجهوده يوم اعتقال الشباب ..


اعداد : احمد عاطف

22 ابريل 2013

ليست هناك تعليقات:

إرسال تعليق