السبت، 8 يونيو 2013

فى دولة اللا قانون .. اعتقال وتحقيقات واحالة ومحاكمة وادانة خلال يوم ونصف فقط ..



عن محاكمة اليوم ونصف

هم 7 شباب اعتقلوا الثلاثاء 30 ابريل 5 مساءا امام محكمة التجمع الخامس والتحقيق معهم بدأ من الساعة 9 الى 2 فجر الاربعاء .. عصر الاربعاء النيابة قررت حبسهم 4 ايام .. ظهر الخميس نزلوا جلسة محاكمة موضوعى وحكم عليهم بالحبس 5 سنوات ونصف.. !!

متضامنى محكمة التجمع الخامس
اثناء ترحيل الـ 8 معتقلين بتهم البلاك بلوك يوم الثلاثاء 30 ابريل امام محكمة القاهرة الجديدة بالتجمع الخامس , حدث اشتباك بين المتضامنين مع المعتقلين وقوات تامين المحكمة .. تم استخدام قنابل الغاز حيث تم اعتقال 7 شباب من امام المحكمة وهم

1- عمر عماد الدين على محمد 19 سنة طالب بتجارة جامعة القاهرة و مراسل صحفي بشبكة اخبار مصر - من الموسكى
2- مصطفي السيد مصطفى ابراهيم "السنى" 25 سنة طالب بمعهد هندسة القاهرة الجديدة - من السويس
3- عبد اللة احمد ابراهيم محمد 21 سنة طالب بمعهد هندسة القاهرة الجديدة - من السويس
4- عمرو محمد عبد الظاهر 22 سنة طالب جامعة عين شمس - من عين شمس
5- احمد محمد محمد اسماعيل 22 سنة عامل - من مدينة نصر
6- محمد فرحات السيد السيد 23 سنة عامل بشركة البان - من المقطم
7- احمد محسن رزق احمد 14 سنة طالب اعداداى - من بولاق الدكرور - اخو عبد الرحمن محسن"مانو" احد معتقلى قضية البلاك بلوك - خد تسليم اهالى وتم تحويله الى محكمة الطفل بابو اتاتة

المحضر والتهم
- تم عمل محضر لمتضامنى محكمة التجمع الخامس برقم 2226 ادارى اول القاهرة الجديدة لسنة 2013 بتاريخ الثلاثاء 30-4 الساعة 5 عصرا .. وكانت تهمهم اتلاف مبنى محكمة الجنايات بالتجمع الخامس واتلاف سيارة شرطة وسب واهانة ظابط والتعدى عليه واتلاف كشك شرطة ومنع سيارة الترحيلات ..


- تم عرض الـ 7 معتقلين على نيابة القاهرة الجديدة اول وبدأ التحقيق معهم مساء الثلاثاء 9 مساء وانتهى التحقيق فى الثانية فجر الاربعاء حيث تقرر تسليم احمد محسن الى ذويه وعرض الباقين باكر انتظارا لورود تحريات المباحث ..

- يوم الاربعاء تقرر حبس الـ 6 شباب لمدة 4 ايام مع عرضهم فى جلسة التجديد يوم الخميس ليفاجىء الجميع بنزولهم جلسة المحاكمة الموضوعى ثم ادانتهم ..


جلسة موضوعى خلال يوم ونص فقط من الواقعة
- جلسة التجديد الاولى للـ 6 متضامنين المعتقلين امام محكمة التجمع اتحولت فجاة لجلسة موضوعى .. يعنى قضية امام قاضى وفيها حكم .. بعد تحقيقات يوم ونصف فقط من اعتقالهم !!- اول مرة بنشوف جلسة موضوعى وحكم بالسرعة دى .. النيابة والقضاء العادى انتهوا من كل التحقيقات والتحريات والاحالة ونظرها القاضى وتم الحكم فيها بالادانة خلال يوم ونصف فقط .. رقم قياسى ولا القضاء العسكرى ..


الهروب الكبير خوفا من مردود الحكم
- بعد انتهاء جلسة الموضوعى انتهت مع الـ 6 معتقلى محكمة التجمع الخامس على حدود الساعة 3 ونصف عصرا .. تم تزويد عدد قوات تامين امام المحكمة ورفعوا بنادق الغاز فى وجه الشباب المتضامنين خارج المحكمة ..
- الحكم مصدرش فى قضية متضامنى محكمة التجمع الخامس الا الساعة 7 ونص مساءا .. والقاضى كل ده كان مريح وخلى الحكم متاخر لاكبر فترة ممكنة لحين مغادرة كل المتضامنين .. وقبلها طلعوا مدرعة بيضاء امام المحكمة..- فى نهاية اليوم القاضى خلص كل الجلسات والقرارات وخلع , وغرفة الجدول ميعرفوش الحكم , وسكرتير الجلسة قفل الباب وهرب من الناحية التانية , وتهرب الجميع من ابلاغ المحامين والاهالى بحكم قضية متضامنى محكمة التجمع الخامس وتم معرفته بمعجزة ..
حكم الادانة التاريخى بعد يوم ونص تحقيقات
- الحكم على قضية متضامنى محكمة التجمع ..التهمة الاولى اتلاف مبنى المحكمة حبس 3 سنين وكفالة 5000 ج لايقاف التنفيذ وغرامة 500 ج .. التهمة الثانية اتلاف سيارة شرطة حبس سنتين وكفالة 5000 ج لايقاف التنفيذ وغرامة 500 ج .. التهمة التالتة والرابعة اهانة ظابط والتعدى عليه حبس ست شهور وكفالة 20000 ج لايقاف التنفيذ .. التهمة الخامسة والسادسة براءة ..
- اختصارا .. اجمالى الحكم فى قضية الـ 6 متضامنين معتقلى محكمة التجمع .. حبس 5 سنين وست شهور او دفع كفالة 30 الف جنيه لكل متهم لايقاف التنفيذ وخروجهم حتى جلسة الاستئناف فقط .. الحكم بالحبس 5 سنوات ونصف "مش مع ايقاف التنفيذ" .. بعدها اما تؤيد حكم الحبس او تخففه او تلغيه اى البراءة..
- الحكم على 6 بس من متضامنى محكمة التجمع الخامس .. واخو مانو اتحول محكمة الطفل .. وهو حكم اول درجة والمحامين هيعملو استئناف فى دايرة جديدة يوم السبت 4 مايو وهينزلو جلسة استئناف خلال اسبوعين وربنا يسهل ..
ورق قضية متضامنى محكمة التجمع الخامس
- قضية متضامنى محكمة التجمع الخامس مجرد محضر 3 ورقات وتحريات سطرين بس .. مفيش اى ادلة او شهود او احراز .. شيوع فى الاتهام بدون تحديد مين عمل ايه اصلا .. !!

- من تهم معتقلى التجمع اتلاف 3 فوانيس اضاءة بالمحكمة الساعة 1 بعد تاجيل قضية الجنايات" السيارة المفخخة " .. رغم ان الشباب اتمسكوا الساعة 5 عصرا اثناء تضامنهم مع معتقلى بلاك بلوك وقت خروجهم .. !!- القضية فاضية وبايظة ع الاخر مفيهاش اى حاجة .. والقاضى - ظابط شرطة سابق - قبل كده حكم بالحبس 10 سنين فى قضية عادية ونزلوا استئناف خدوا براءة ..

سؤالين فى الاخر
- ازاى قاضى بينام بعد حكم حبس 5 سنين ونص لـ 6شباب ملهمش اى ذنب فعلا فى قضية بايظة .. حكم ظالم يضيع شبابهم ويحطم حياتهم ويدمر اسرهم.. ؟؟!!
- العيل اللى ضرب ظابط محكمة التجمع على آفاه وسبب اشتباك الامن وضرب الاهالى والستات .. وشال الليلة 6 شباب بـ 5 سنين ونص حبس ..هينام ازاى ده .. ؟؟!!



احمد عاطف
حملة حقى يادولة
3 مايو 2013

ليست هناك تعليقات:

إرسال تعليق