شهادتى عن اعتقالى وتعذيبى 19 نوفمبر 2012 ( محمد محمود 3 )

- انا نزلت فى ذكرى محمد محمود بعد مرور عام على المجزرة اللى سقط فيها 55 شهيد .. نزلت عشان القصاص .. نزلت عشان حق الشهداء بعد سنة عدت ومفيش اى حاجة حصلت .. مفيش اى محاكمات لقتلة الشهداء .. ده كمان معتقلى محمد محمود هما اللى كانو بيتحاكمو .. نزلت عشان عدت خمس شهور من حكم الرئيس مرسى بعد ماوعدنا بان دم الشهداء فى رقبته ومعملش اى حاجة لسه .. نزلت عشان كان المطلب الرئيسى تطهير الداخلية وجه الرئيس مرسى وخلى قيادتها تترقى .. نزلت عشان الداخلية متغيرتش وكل شوية بيروح ضحية فى كل مكان فى مصر لبطشها وجبروتها .. مفيش اى احترام لكرامتنا ولا اى معاملة ادمية لينا وكأننا عبيد عند الداخلية ..

* الاعتقال والضرب والسحل *

- انا نزلت مع اخويا الصغير فى يوم الاتنين 19 نوفمبر 2012 .. واتمسكنا الساعة 1 ونص بليل فى كماشة فى شارع الشيخ ريحان خلف مجمع التحرير ( شارع كنيسة قصر الدوبارة ) .. كنا حوالى 16 واحد اتعملت علينا حفلة ضرب وسحل .. كان فيه بنت واخوها العساكر كانو هيعتدو عليها لولا انها صرخت وعملت ان مغمى عليها فسابوها هى واخوها وخرجت بمعجزة بعد ماخدو كمية من الشتايم والاهانات ( عرفت ده بعدين ) ..

- انا كان عندى جرح قديم فى راسى ( 4 غرز ) وحاطط قطن .. اول ما العساكر شافو الجرح واحد مسكنى وقالهم "استلموه ده" .. كله كان بيدخل وبيحاول يضرب فى مكان الاصابة بالعصيان .. كنت فى وسط حوالى 4 او 5 عساكر ماسكنى من اجمالى 20 او 30 عسكرى حواليا وفيه كل شوية عساكر تخش تضرب وتاخد نصيبها .. كان معاهم ناس بلبس مدنى شكلهم مسجلين خطر بيضربو بالعصيان مع العساكر .. 

- حاولت احمى راسى والجرح فخدت ضربات كتير على صوابعى ودراعى ( ولما كشفت بعد ماخرجت لقيت صابع الابهام مكسور ) .. بمعجزة رميت القطن عشان العساكر الجديدة اللى جايين يسجلو فى الحفلة عشان مياخدوش بالهم من الجرح ..  

- الضرب كان بالعصيان وضهر البنادق والبيادات بالبوكسات والشلاليت باى حاجة وفى كل مكان ( راس ضهر كتف بطن رجل ) وكانو بيركزو على الراس .. ضربونى مرتين بالعصيان على المنطقة الحساسة من الامام .. وفيه حد من ورا كان معاه عصاية وزقها عشان تلامس المؤخرة كنوع من الاذلال النفسى ..

- مكنتش قادر اشوف اخويا او حد من اللى معايا حصلهم ايه .. مقدرتش اميز الشتيمة من وسط الضرب .. كنت بتضرب بس .. 

- وقعت ع الارض من كتر الضرب .. سحلونى ع الارض وكنت بغطى راسى بدراعى وضامم رجلى .. كان الضرب فى كل مكان .. لحد معملت انى اغمى عليا .. سحبونى لحد عربية الترحيلات بعد مجلس الشورى ..

* فى عربية الترحيلات *

- عربية الترحيلات كانت متغرقة كلها بول فى المكان اللى بنقعد عليه كنا 15 واحد – منهم اخويا -  ودخل معانا واحد ( شكله مخبر جدا ) تحت اسم احمد ثابت – عشان ياخد معلومات مننا جوه او يشهد علينا - واخد بوكس فى عينه قالنا انا مقبوض عليا معاكو – رغم انه مكنش فى الكماشة - وهو الوحيد اللى طلعوه بموبايله وفلوسه وكان العساكر فى الحبس بيندهو عليه باسمه ..

- كان معانا شاب مضروب جامد جدا لما دخلنا عربية الترحيلات انهار على الارض .. جينا نشوفه لقيناه مفيهوش نبض افتكرناه فى الاول مات وقرينا الفاتحة عليه وكانت حاجة صعبة جدا .. بعدها واحد مننا شافه فقالنا ده لسه عايش بس عنده هبوط فى الدورة الدموية .. لما وصلنا الحبس روحنا الزنزانة والشاب ده متنقلش معانا ومعرفناش عنه اى حاجة .. محدش كان يعرف اسمه ومعرفتش اميز شكله من ضلمة عربية الترحيلات .. ( وسجلت ده فى تحقيقات النيابة ) ..

* الاصابات والسرقات *

- النتيجة لكل الضرب ده .. مكنتش عارف احرك عضمة فى جسمى .. جرح الراس اصيب من الضرب .. شفتى اتدعكت وكانت بتنزف بشدة .. تورم اعلى الحاجب .. تورمين بالراس .. كدمات وتورمات مختلفة فى الضهر والساقين .. الم رهيب بالبطن من البوكسات اللى خدتها .. القميص مقطوع فيه زراير .. القميص والفانلة الداخلية كان عليها دم من جرح الراس والشفة .. ( وسجلت ده فى تحقيقات النيابة ) ..

- كان فيه اصابات اكبر منى بكتير .. اخويا اتفتحت راسه بجرح قطعى كبير نزف لمدة ساعة وكان ورام بشدة .. اضطروه نقله للمستشفى ( والا هيجيبلهم مصيبة ) .. عمل 14 غرزة فى راسه وكان فيها خراج شاله وكان بيكح دم .. مناخيره حصل فيها كسر ( اتاكدنا بعد خروجنا ) وكانت بتنزف بشدة وواخد بوكس فى عينه ..

- فيه معتقل اخر كان مريض بالسكر اصيب بكسر فى الحوض الامامى والخلفى وكسر فى فقرتين فى الظهر وكسر فى الانف ورفضو يعالجوه ولا حتى يصرفوله الانسولين عشان مرض السكر .. وكان داخل على غيبوبة السكر لولا ستر ربنا فى اليومين اللى قعدهم .. ولحد الان بيتعالج ومقدم على عملية كبيرة ربنا يشفيه لانه معرض للشلل لا قدر الله ..

- وفيه واحد اتكسرت سنانه ( عاهة مستديمة ) .. فيه ناس كتير هدومها اتقطعت من الضرب .. وفيه شباب كان بنطلونهم نفسه مقطوع من الضرب والسحل .. فيه اطفال مضروبين فى وشهم بطريقة بشعة ..

- طبعا والعساكر ساحبنى كانو بيمدو ايديهم فى جيبى وبياخدو اى حاجة لنفسهم .. وكل المعتقلين اتعرض للسرقة .. العساكر كانو كأنهم بيقسمو الغنيمة على نفسهم ..

* داخل معسكر الامن المركزى بالجبل الاحمر*

- اتنقلنا لمعسكر الامن المركزى بالجبل الاحمر مباشرة .. طبعا ده مكان احتجاز غير قانونى .. دخلنا زنزانة 8 متر فى 4 متر فى السجن العسكرى الملحق بالمعسكر .. وصل عددنا فى اول ليلة 19 شاب بعد اعتقال اخرين .. كلهم كان معمول عليهم نفس حفلة الضرب والسحل .. جم العساكر يعملو علينا التشريفة بس الظابط قالهم خلاص هما خلصانين .. 

- طبعا المحضر اتعملنا فى المعسكر على 3 او 4 الفجر وكان اى كلام .. اتسالنا سؤالين واتكتب اى كلام فى المحضر ولا مضينا على حاجة ولا شفنا المحضر .. منعرفش حتى اللى عملنا المحضر صفته ايه ولا تبع ايه ..

- اول ليلة كنا 19 واحد تانى يوم كان فيه 91 شاب فى الزنزانة .. 91 شاب من اطهر وانضف الشباب فى مصر كله نايم فوق بعض على البلاط فى السقعة وبيتالم ومكسور فى كل جسمه .. 91 شاب بيمثلو كل طبقات المجتمع بيمثلو كل الافكار والتوجهات.. كان فيه شباب مستقل .. فيه كان نازل عشان صاحبه او قريبه مات او اتصاب بعاهة مستديمة من الداخلية .. فيه اعضاء احزاب وحركات وحملات .. فيه ناس بسيطة تضررت من الداخلية باشكال اخرى فى حياتها اليومية .. فيه ناس الداخلية بلطجت عليهم وعلى اسرتهم .. كله كان نازل ياخد بتاره واتمسك .. وكان فيه اللى بيتفرج وملوش دعوة بالاحداث .. هددونا فى الاول اننا لو ملتزمناش هيطلقو علينا كتائب الامن المركزى ..

- اتحقق معانا مرة تانية فى المعسكر مع ناس ( امن دولة – الامن الوطنى ) تحت الضغط والتهديد اللفظى .. كانو بيحاولو يجبرونا اننا نطلع اى اسماء اى معلومات اى حركات اى اشخاص .. تركيزهم على الالتراس والمشاغبين والملثمين .. عايزين يعرفو مين بعت الدعوات ع الفيس .. عايز اسماء اكونتات على الفيس .. اى معلومات .. وعملولنا طبعا كلنا ملف فى امن الدولة بكل تفاصيل اهلنا كل حاجة .. 

- فيه واحد اسمه احمد جمال عيد ( احمد فرعون ) اتمسك معانا وقالهم انه ائتلاف شباب الثورة ( على اساس انه هيتعامل باحترام ) استجوبته امن الدولة 3 مرات وقالوله " هتيجى معانا الادارة شوية انت قديم فى الميدان بقالك سنتين وهنعرف منك معلومات عن كل واحد انت تعرفه " .. ولما خد اخلاء سبيل من النيابة الخميس 22-11 مطلعش واترحل من معسكر الامن المركزى يوم الخميس بواسطة افراد امن الدولة .. ( عرفنا بعدها انه اترحل لسجن طره لاستجوابه والضغط عليه وخرج بعدها ) ..

- طبعا احنا جوه المعسكر معزولين عن العالم الخارجى .. مفيش اى علاج ولا زيارات .. الدكتور دخل شافنا فى الاول وفى الاخر مخدتش الا اتنين تلاتة يعالجهم وساب الباقى .. ولما فيه مجموعة خدت اخلاء سبيل – انا منهم - بعد ماتعرضت على النيابة يوم الثلاث 20 نوفمبر رجعنا المعسكر بس قالولنا هناك اننا خدنا 4 ايام .. فجاة يوم الاربع 21 نوفمبر بليل قالولنا يالا عشان هتخرجو دلوقتى ..

- كانو استلمو منى وانا داخل المعسكر البطاقة وكارنيه نقابة المهندسين والمفاتيح والحزام والكوفية كانت عندهم ومخدتش حاجة وانا خارج ..

- رمونا انا وال 12 اللى خدو اخلاء سبيل الاربع الساعة 11 بليل بره المعسكر على اطراف مدينة نصر .. مفيش معانا اى حاجة لا فلوس ولا موبايل ولا بطاقة ولا حتى مفاتيح الشقة .. وفيه واحد من منيا القمح خرج تانى يوم الساعة 12 بليل "حافى" وكانو خدو الجزمة بتاعته جوه ..

* القبض العشوائى *

- لما حصلت الكماشة فى شارع الشيخ ريحان ورا مجمع التحرير كل اللى كان فى الشارع اتقبض عليه .. ناس بتتفرج من بعيد ناس معدية ناس بتتظاهر بس ملهاش دعوة بالاشتباك اى حد .. وده من شهادات حقيقية من الناس جوه معايا .. مبيبقاش حتى فيه اى فرصة لتوضيح اى حاجة .. كل اللى موجود بيتمسك وبيبقى متهم بالتخريب وبيتعمل عليه حفلة الضرب ..

* اعتقال الاطفال القصر وتعذيبهم *

- من كل المعتقلين ال 91 فى الزنزانة كان تقريبا ربعهم اطفال قصر اعمار 13 و 14 سنة متهمين بالتخريب .. محبوسين فى معسكر امن مركزى ومضروبين وفيهم كدمات .. كان الاطفال بيعيطو ولما جه عسكرى ينقلهم للزنزانة كان فيه بيقول " والنبى ياعمو متسيبنيش جوه " وهو بيعيط ..

- لما روحت النيابة بعد ماخرجت لقيت فيه اهالى واقفين بشهادة ميلاد ابنهم وبيدورو عليه .. ابنهم عبد الرحمن مواليد 2004 وتم اعتقاله فى الاحداث .. يعنى ايه طفل 8 سنوات يتمسك ويتهموه بانه مخرب ومثير شغب ..

شهادة ميلاد عبد الرحمن خالد مواليد 2004 ومعتقل فى محمد محمود

بعض الصور لاثار الاصابات بعد مرور ست ايام عليها ..

كدمة فى الفخذ واثار السحل

كدمات فى الظهر واثار السحل

تورمات فى الساق

كدمات فى الساق

كسر بعقلة الابهام وكدمات فى الاصابع

جرح بالراس 4 غرز وتعمد اصابته

احمد عاطف

 27 نوفمبر 2012

رؤية وتحليل شخصى لاحداث جمعة الحساب .. 12 اكتوبر 2012 ..

طرف مؤيدى مرسى :

- اول حاجة طرف مؤيدى مرسى كان فيه مين .. انا دخلت مابينهم كذا مرة.. فعلا اغلبيتهم اخوان واسرهم وكتير من المحافظات.. واوتوبيسات الاخوان كانت مركونة عند ماسبيرو وعبد المنعم رياض.. ده بالاضافة الى مؤيدى مرسى بعض من انصار حازم والاسلاميين..

- الاخوان والاسلاميين اللى كانو فى الميدان ممكن نقسمهم لتلات اقسام.. 

1 - جزء قليل شايف ان دول انصار متهمى موقعة الجمل..متفهمش.. 

2 - جزء تانى مقتنع بان دول انصار البرادعى وحمدين وعلمانيين وكفرة وعايزين يسقطو الاخوان.. او عايزين يفسدو وينشرو الانحلال..

3 - جزء تالت عارف ان دول ثوار وشباب عادى بس زهقو منهم ومن المظاهرات بتاعتهم ومعارضتهم لمرسى.. ودول الاغلبية..  

طرف الشباب : 

- تانى حاجة طرف الشباب.. من الاختلاط باشتباكات كتير.. المرادى صفوفنا غير احداث سفارة سوريا1و2 وسفارة امريكا والمنصة وبدين.. اغلب الاشتباكات الاخيرة كانت فئات صغيرة العمر وبتتحرك بدون مبدا او هدف.. المرادى شباب كتير نزل واتحرك عن اقتناع ووعى.. من الاخر المرادى نزل جزء شباب من بتوع اشتباكات 2011 .. فيه تحرك وغضب شبابى فعلى ضد الاخوان حتى لو انت لسه محستش بيه.. 

- موقف 6 ابريل ماهر كان غامض من الاول ومحددوش توجه معين وبقى على الحياد..اما 6 ابريل الجبهة نزلت باعلامها واعضائها وسط الشباب 

- فيه مشاركات للدستور والتيار الشعبى واشتراكيين..بس الاشتباكات كانت حالة احتقان عامة ضد الاخوان وشباب كتير مش مسيسين فعلا.. 

- الالتراس مكنش فيه اى تواجد رسمى ليه وسط الصفوف سواء اثناء او بعد الاحداث..زى ما اعلنو على صفحتهم.. ودى حاجة اقدر ااكدها..

- اى مواقف فردية سواء لاعضاء من 6 ابريل او الالتراس فهى حرية شخصية ومش بتعبر عن الكيان.. انا بتكلم عن موقف رسمى او جماعى..

بهدوء .. الاخوان يتحملو مسئولية الاشتباكات لاسباب .. :

  

جانب من اشتباكات جمعة الحساب بشارع طلعت حرب

- لو هنتكلم بعقل وبهدوء.. رايى الخاص ان اشتباكات النهاردة دى خطا الاخوان لاربع اسباب رئيسية.. كما يلى.. 

1 - اولا الاخوان هم الحزب الحاكم..ومش مفهوم ان الحزب الحاكم ينزل للتظاهر وهو فى ايديه كل القرارات والسلطات..التظاهر للمعارضة .. ولو هنتكلم بصراحة.. نزول الاخوان مكنش للمطالبة بمطالب اصلا..بس لمجرد الشوشرة على مظاهرات المعارضين وعمل تاييد شعبى للرئيس ..

2 - ثانيا معارضى مرسى اعلنو عن فعالية فى الميدان 12 اكتوبر من 3 اسابيع وسموها جمعة الحساب.. مينفعش يهبط مؤيدي مرسى فجاة عليهم .. ولو هنقيس الامور نظريا.. موقعة الجمل كانت لنفس السبب.. المعارضين فى التحرير وفجاة مؤيدى المخلوع هبطو عليهم.. 

3 - ثالثا الاخوان بداو الاشتباكات عبر شهود عيان كتير..كسرو منصة التيار الشعبى..واعتدو على الاعداد القليلة اللى هتفت ضد المرشد ..

4 - رابعا.. الاخوان منظمين ويقدرو يتحكمو فى حشودهم.. بسهولة كان ممكن ينسحبو من الاول بقرار من مكتب الارشاد وكله هينفد فورا.. الاخوان هما اللى انسحبو من نفسهم الساعة 6 بالظبط والميدان فضى تماما .. عكسنا محدش بيحركنا ومستحيل تقنع الشباب بوقف الضرب .. انتظار الاخوان ست ساعات والاشتباكات مستمرة بيحملهم جزء كبير من المسؤلية.. خصوصا ان كان فى ايديهم اتخاذ القرار من الاول.. 

رؤية لمجمل احداث جمعة الحساب :

الاخوان يفرون امام جموع الشباب الغاضبة

- اعتقد ده اول موقف مباشر وغضب "شبابى" ضد الاخوان والحزب الحاكم لمصر.. حتى لو كان مشارك فيه نسبة معينة.. 

- لاول مرة نلاقى محدش بيتكلم عن عدم وجود الداخلية "المختفية" خلال اشتباكات 6 ساعات على بعد امتار من وزارتهم.. 

- لاول مرة كمية من تصريحات وبيانات اخوان متضاربة..تصريحات عن عدم وجود اخوان او نزولهم الساعة 3 او عدم وجودهم ودى مجموعة بتشوهم .. وتصريحات اخرى عن وجود الاخوان ووقوع اصابات او فيه طرف تالت بيضرب او ان دول شباب عادى او سياسيين بس هما اللى بداو..متفهمش ..

- تانى مرة يتورط الاخوان فى اشتباكات مباشرة ضد الشباب بعد احداث مجلس الشعب.. بس المرادى اشتباك مفتوح باعداد كبيرة تحت حكمهم ..

- فيه اصابات كتيرة للشباب النهاردة.. اصابات فى مختلف المناطق.. اصابات برخام.. اصابات فى العين.. وفيه اصابة بخرطوش.. 

شاب مصاب خلال احداث جمعة الحساب بطوب ميليشيا الاخوان

- فيه مصاب برخام فى وشه عمل 12 غرزة فى مستشفى الهلال.. لقى ناس بتتحرى عن المتواجدين هناك وهل ليهم علاقة بالاحداث ولا لا..!!

- باسم محسن معتقل السويس بعد العباسية وفقد عين فى احداث محمد محمود.. الاخوان ضربوه وسحلوه اليوم على اسفلت محمد محمود.. 

 

اصابة باسم محسن خلال احداث جمعة الحساب

- اللى حضر مشهد هجوم الاخوان الرهيب العصرية من ناحية المجمع وعبد المنعم رياض..وزنقو الشباب فى ش التحرير وطلعت حرب..صعب جدا.. كان بيقع قدامى كتير بطوب الاخوان ومكنوش بيفرقو بين ولد وبنت..وقدامى واحد وهو شايل بنت مغمى عليها والاخوان بيجرو وراه.. 

- ده مش تشويه او تهويل للاحداث بس فعلا كان موقف صعب جدا.. واغلبية اللى نزلو النهاردة هيعرفو وهيحسو بمدى الضرب.. 

- ده رايى المجمل فى احداث جمعة الحساب .. وفى الاخر كل واحد حر فى وجهة نظره.. وله رؤيته المختلفة.. 

احمد عاطف

الجمعة 12 اكتوبر 2012

لحظات .. فى مسار بطل اخر ..

 

اللحظة الاولى : الاحد 2 يناير 2011 مساء .. داخل احد المنازل بضاحية مطار امبابة ..

كان البرد قارسا بتلك الامسية فى الايام الاولى للسنة الجديدة .. دلف الصبى الصغير –  ذو الـ 16 ربيعا – الى غرفته الضيقة بذلك المنزل فى ضاحية مطار امبابة .. فتح حاسبه الشخصى وتوجه مباشرة الى صفحته المفضلة " كلنا خالد سعيد " على موقع " فيسبوك " .. مرت عيناه سريعا على اخر كتابات " ادمن الصفحة " ليتدفق الحماس والامل الى روحه من جديد .. كم غيرت تلك الصفحة الافتراضية الكثير فى قلبه ووجدانه .. 

يتذكر الصبى بوضوح اثر تلك الاحداث فى العام المنصرم على تفكيره ومعتقداته .. كيف - بمقتل شاب دون ادنى ذنب - تغير منهج حياته بالكامل .. جريمة قتل الشاب خالد سعيد على ايدى اولئك الظباط الاوغاد دفعته دفعا الى المشاركة والنزول تضامنا معه .. بل وقلبت حياته راسا على عقب .. فاهمل دراسته – وهو الطالب المتفوق بالصف الثانى الثانوى – ليقبل على وقفات احتجاجية امام دار القضاء ونقابة الصحفيين مع حركات كفاية و 6 ابريل وغيرها .. كانت جل اهتمامات الصبى الصغير خلال اخر عامين التضامن مع شعب فلسطين المحتل والعراق المفتت .. بعد تلك الجريمة النكراء تحول فكره الى بلده الام موقظا الحافز الوطنى بداخله .. بدأ يعيد النظر فى كل الامور من حوله .. كيف تردت الاحوال وساءت فى كل المجالات على هذه الارض الطاهرة المليئة بالخيرات .. !!! لابد ان يكون له دور فعال فى مقاومة كل هذا الكم من الفساد .. لم يخش شيئا من بطش الامن السافر او جبروت النظام المستبد فى قمة طغيانه .. لم يكن الصبى قد تعدى بعد السادسة عشر من عمره ولكنه قلبه قد فاض قوة وحماسا واستقر فى وجدانه الكثير مما لم يدركه من هم فى اضعاف سنه .. 

فى تلك الليلة الباردة من شهر يناير كان القلب الصغير بالغرفة مشتعلا يتمزق من الالم بسبب ذلك الحادث الارهابى المفتعل منذ يومين فى كنيسة القديسيين والذى راح ضحيته قرابة 21 شهيد وعشرات الجرحى فى محاولة لاشعال نار الفتنة من جديد فى قلب الوطن الراسخ .. انتقل الصبى الى صفحته على " فيس بوك " وهو يبحث عما يشفى غليله ليجد ضالته فجاة - فعالية تضامنية مع شهداء الكنيسة يوم 7 يناير - كانت عبارة عن مسيرة مسائية من ساقية الصاوى بالزمالك الى كنيسة المرعشلى تحت عنوان " هنعيد سوا كلنا مصريين كلنا دروع بشرية لحماية مصر " فى ذكرى عيد الميلاد المجيد ..

 تواصل الصبى سريعا مع المنظمين للفعالية - ومنهم د. محمد الصاوى - وابدى استعداده للمساهمة بكل ما يستطيع .. ساهم الصبى فى الحشد الالكترونى عبر فضاء الانترنت واتطلع على تفاصيل تنظيمية على الارض سيقوم بها اثناء الفعالية كعضو منظم .. قام بتسجيل ما يلزمه من لافتات وادوات حتى يبدأ فى اعدادها الايام المقبلة ثم خلد الى النوم وقد ارتاح ضميره بانه سيؤدى واجبه فى محاولة للم شمل الامة وادانة اى انتهاك ضد اى فصيل من نسيج الشعب .. 

احمد طه اثناء وقفة كنيسة المرعشلى 7 يناير 2011

اللحظة الثانية : الثلاثاء 25 يناير 2011 منتصف الليل .. داخل نفس المنزل بضاحية مطار امبابة ..

عاد الصبى الصغير الى منزله فى منتصف الليل وهو لا يكاد يلتقط انفاسه من فرط الاثارة والحماس .. لم يتخيل ابدا ان تاتى هذه اللحظة الفارقة .. لم يتخيل ان ينطق ابو الهول الذى صمت خلال 30 عاما .. لم يتخيل ان الحلم فى التغيير قد يتحقق قريبا .. اندفع الى حاسبه وفتح حسابه الشخصى على " تويتر " - والذى يشارك به منذ فترة - حيث يدون اراءه وافكاره المتوهجة من خلاله .. نقل سريعا بعض التغريدات عن هذا اليوم المشهود .. 25 يناير .. ثم قام بفتح مدونته " فداكى يا بلدى " حيث كان يسجل بها - منذ شهور عدة - كل مايجول بخاطره من مشاعر وطنية متدفقة تجاه بلده .. 

سجل الصبى فى مدونته كل ما مر به خلال يومه الرهيب .. سجل لهفته الشديدة لفعالية " 25 يناير وقفة ضد الفساد والظلم والقهر " منذ ان اعلنت عنها صفحة " كلنا خالد سعيد " منذ عشر ايام .. دون كيف توجه لصلاة الظهر فى مسجد مصطفى محمود بالمهندسين حيث كان التجمع بعدها فى الساعة الثانية ظهرا ليجد ان الاعداد محدودة الى حد ما .. شرح كيف شارك فى الهتافات والمطالبة بالحرية والعدالة الاجتماعية مع ازدياد الاعداد بالمسيرة حتى تخطت الالفى شخص عندما وصلت الى دار القضاء العالى حيث انضمت اليها مسيرات اخرى من مساجد متفرقة .. وصف الصبى كيف اعتلى رجال الشرطة - ومعهم اناس بزى مدنى وبلطجية - اسطح مبنى الشهر العقارى ونقابة المحامين وبدأوا فى الهجوم على المتظاهرين السلميين بالخراطيش والطوب لتبدأ الاشتباكات .. اوضح الصبى كيف ازدادت اعداد المتظاهرين بسرعة حيث ان تلك المنطقة حيوية للغاية ويمر بها آلاف المواطنين يوميا .. لم يصدق الصبى كل ما رءاه فى هذا اليوم الغير عادى .. كان فى قمة الانبهار والفخر بعد ان راى الوف من الشعب تصرخ من الغضب لاول مرة فى شوارع العاصمة المنتفضة ..

سجل الصبى كل ما رءاه ولمسه وشعر به .. ثم استلقى على سريره وهو فى ترقب ولهفة للنزول اليوم التالى ليستكمل مسيرة الكفاح فى مقاومة ذلك النظام الذى عاث فى الارض فسادا وطغيانا .. 

اللحظة الثالثة : الجمعة 28 اكتوبر 2011 بعد صلاة المغرب .. ميدان التحرير ..

كانت الجنازة حاشدة فى مساء تلك الجمعة بميدان التحرير .. شارك الصبى فى تشييع جثمان عصام عطا - شهيد التعذيب داخل سجن طره - حيث انطلقت المسيرة بالنعش من مسجد عمر مكرم بعد الصلاة عليه وطافت بالميدان عدة مرات .. كان الصبى يهتف من اعماق قلبه ضد التعذيب والانتهاكات وكان احيانا يقود الهتاف بكل ضراوة ضد العسكر ووزارة الداخلية .. 

كان التعب قد حل بجسد الصبى الصغير وقد انهكته فعاليات اليوم الطويل ولكن روحه ما تزال قوية صامدة .. استرجع الصبى فعاليات جمعة اليوم - جمعة الانتقام من بقايا النظام - التى شارك فيها بدءا من قدومه الى الميدان فى الصباح الباكر مرورا بتنظيم حركة المرور وكتابة اللافتات وتوزيع " منشورات " ضد انتخاب الفلول ثم مسيرة الى مبنى " ماسبيرو " بعد صلاة العصر تنديدا بمذبحة ماسبيرو واخيرا جنازة الشهيد عصام عطا ..

ورغم تلك المجزرة البشعة منذ 3 اسابيع فقط - والتى سقط فيها 27 شهيدا وعشرات المصابين - الا ان المحتجين الذين شاركوا فى تلك المليونية لم يتجاوزوا الاف قليلة تجمعوا فى احد اركان الميدان الواسع وهو ما لم يفت اطلاقا فى عزم الصبى الذى يدافع عن قضية يؤمن بها ولا يلتفت للاعداد من حوله ..

لم يشعر قلب الصبى بالتعب او اليأس ابدا .. لم يمل الصبى من تتابع عشرات المليونيات الاسبوعية منذ اندلاع الثورة فى الخامس والعشرين من يناير الى هذا اليوم والتى ما تزال تنادى بالحرية والعدالة الاجتماعية .. شارك الصبى باخلاص فى اغلبية الفعاليات من بدايتها الى نهايتها .. ساهم ايضا فى الاعتصامات المملة البطيئة .. كان متواجدا فى معظم الاشتباكات وفض الاعتصامات خلال التسع شهور الاخيرة .. لم يشعر - ولو للحظة - بالاحباط من عدم وجود اى تغيير منذ قيام الثورة بل وساءت احوال البلاد اكثر واكثر .. كان قلب الصبى مازال ينبض املا وتفاؤلا بمستقبل افضل للوطن ..

 اللحظة الرابعة : السبت 29 اكتوبر 2011 فجرا .. امام البوابة الخلفية لدار القضاء العالى ..

احمد طه اثناء اقتياده الى بوكس الشرطة من امام دار القضاء 28 اكتوبر 2011

كان الصبى يتم اقتياده بقسوة من ملابسه من داخل دار القضاء العالى فى فجر ذلك اليوم لينقل الى سيارة الشرطة المكشرة عن انيابها امامه .. لم يعد يفهم ماذا الذى يدور .. لم يعطه ايا من الذئاب الحائمة حوله اى فرصة للاستفسار لماذا يتم ضربه وسحله وانتهاك جسده ومن هم وما هى جريمته .. كان جسده الضئيل منهارا بالكامل .. خلال بضع ساعات فقط حدث له ما لم يتخيل ان يتعرض اليه فى يوم من الايام .. سمع من حوله اصوات كاميرات تصور ولكنه لم يستطع ان يرى شيئا من قبضة معتقله الغليظة .. حاول استجماع شتات نفسه وتجميع افكاره وهو منقاد وسط رجال الامن بزيهم الميرى مع اخرين بالزى المدنى .. 

استرجع الصبى ماحدث له خلال الساعات القليلة الماضية.. حيث تم اعتقاله من امام صيدلية الاسعاف المواجهة لدار القضاء العالى اثناء عودته لمنزله ليلا - بعد انتهاء فعاليات المليونية - ليجد رجلان يضربانه ويسحلانه ويجرناه الى الباب الامامى لدار القضاء حيث تجمع عدد من الرجال الغلاظ وقاموا بالاعتداء عليه بالضرب والسب والاهانات حتى فقد الوعى .. استيقظ داخل سيارة شرطة لينقل الى مكتب بالطابق الاول بدار القضاء حيث قام 10 اشخاص بزى مدنى بضربه وتعذيبه مجددا .. تم وضع شريط اسود على عينيه ليستجوبه شخص متهما اياه بتسع تهم منها الاشتراك فى ثورة 25 يناير والاشتراك مع حركة 6 ابريل فى حملة الدائرة البيضاء والسوداء وتلقى اموال من الخارج والتدريب خارج مصر على كيفية التظاهر – وهو لا يملك بطاقة ولا جواز سفر – وايضا تهمة التدوين على " الفيس وتويتر " .. وبعد انكاره للتهم قام بضربه بقسوة ثم قام احد الاشخاص بالاعتداء الجنسى عليه واغتصابه مما ادى الى نزيف لمدة نصف ساعة .. ثم ضربوه مرة اخرى وقصوا شعره وسالوه عن مدى معرفته ببعض الشخصيات الثورية فانكر معرفته بهم ليضربوه مجددا ..

مرت كل هذه اللقطات سريعا بذهن الصبى حتى تم نقله الى سيارة الشرطة تحت حراسة امنية مشددة .. انطلقت السيارة الى جهة لا يعلمها الصبى وهو لا يدرك مصيره المجهول .. بل لم يستوعب بعد اى انتهاك وتعذيب تعرض اليه خلال الساعات القليلة الماضية وممن وما الجرم الذى اقترفته يداه ..

شهادة احمد طه بخط يده من داخل السجن حول اعتقاله وتعذيبه

تى شيرت احمد طه الذى كان يرتديه اثناء الاعتداء عليه امام دار القضاء

اللحظة الخامسة : الخميس 12 يناير 2012 مساء .. عنبر الاستقبال داخل سجن المرج ..

دلف الصبى الى عنبر الاطفال داخل سجن المرج فى ليلته الاولى به .. كان من المفترض ان يتم نقله لحبس انفرادى باستقبال السجن ولكن بسبب ظرف ادارى تم نقله تلك الليلة الاستثنائية الى ذلك العنبر الذى يعج بقرابة الـ 50 سجينا من دون السن .. تعرف الصبى على بعض سكان العنبر .. كان من بينهم شاب يدعى محمد على - مازال فى ال 19 من عمره - وهو الوحيد المعتقل سياسيا اما الاخرين فهم جنائيين .. اخبره محمد انه تم اعتقاله فى احداث مجلس الوزراء .. لم يكن الصبى يعلم عن تلك الاشتباكات الكثيرة فى قلب العاصمة الا قليلا .. لم يستوعب الصبى كلام الشاب عن احداث عنف بمحيط مبنى مجلس الوزراء او مدى شدتها او تلك التهم الهائلة التى تم تلفيقها الى طالب الثانوى ذلك .. تركه الصبى ليستلقى على سريره ويسترجع بذاكرته فترة شهرين ونصف من العذاب ما بين قسم الوايلى وقسم الازبكية وسجن طره واخيرا سجن المرج ..

- جالت بخاطر الصبى ذكريات اسوأ ايام حياته فى قسم الوايلى البغيض حيث تم نقله اليه مباشرة من دار القضاء بعد اصاباته الجسدية والنفسية الهائلة .. تذكر كيف قضى هناك قرابة 25 يوما منهم 15 فى حبس انفرادى فى غرفة مفقرة بشبابيك مفتوحة وبها صنبور مياة مفتوح ليل نهار حتى تكون الارض مبتلة دائما فى عز الشتاء فلا يمكنه النوم .. كيف كانت الغرفة بلا اى فرش والارضية كلها رمال وبلا اى مكان للتبول .. كيف ظل طوال هذه المدة بلا اية خدمات او رعاية صحية بعد اصاباته الجسدية البالغة .. بل لا تفتح بوابة الزنزانة الا كل عدة ايام ليقذف بـ "ساندويتش" او اثنين .. كيف تم نقله بعدها الى عنبر جماعى ليقبع 10 ايام بين مساجين جنائيين عتاولة بمختلف التهم من فوق السن .. ؟؟!! كيف تحمل 25 يوما بقسم الوايلى فى التحقيقات بلا محامين للدفاع عنه .. ؟؟!! بل والاغرب ان والده لم يعلم عنه شيئا لمدة 17 يوما من اختطافه واحتجازه بقسم الوايلى حيث كان ظباط القسم ينفون وجوده تماما .. !!

 - استعاد الصبى ذكريات نقله الى قسم الازبكية لفترة شهرين قضى منهم 10 ايام حبس انفرادى والفترة المتبقية كانت مع متهمين جنائيين فوق السن ايضا .. !!! 


 - تذكر الصبى كيف تمت محاولة نقله مرتين الى سجن طره .. وكان يتم ارجاعه فى نفس اليوم لقسم الازبكية لانه تحت السن ولا يمكن قيده بسجلات السجن .. ؟؟!!

محضر قسم الازبكية ضد احمد طه

- استرجع كيف تم عرضه على نيابة عادية وليس نيابة الطفل رغم انه مازال تحت السن .. ؟؟!! كيف تم التحقيق معه اربع مرات مرة داخل دار القضاء ومرة مع شرطة عسكرية بقسم الوايلى ومرة اثناء عمل محضر بقسم الوايلى – وتم ختمه بختم قسم الازبكية للتمويه مع استمرار حبسه بالوايلى حتى لا يصل اهله اليه – ومرة اخيرة عبر محضر بنيابة الازبكية .. ؟؟!! كيف اتهموه بحيازة سلاح نارى وذخيرة رغم ان المثبوت بالمحضر انه كان معه كراسة محمول فلاشة .. ؟؟!! كيف رفض وكيل النيابة عمل تقرير طبى عن حالته ورفض ذكر حالة التعدى الجنسى عليه او اصاباته المتفرقة فى انحاء جسده الواهن خلال التحقيقات .. ؟؟!! كيف ظل تحت حراسة مشددة للغاية اثناء تنقلاته للنيابات والمحاكم ثم التجديد الابدى بحبسه .. !!!

- مرت كل هذه الذكريات الكئيبة سريعا بذهن الصبى قبل ان ينام وهو يعلم بانه سينقل مجددا الى السجن الانفرادى بالغد.. وربما يعود مرة اخرى لعنبر الاطفال الذى يعج بالمتهمين الجنائيين وخلافه الى ان يقضى الله امرا كان مفعولا ..

من رسومات احمد طه داخل سجن المرج يوم 14 ابريل 2012

اللحظة السادسة : الاربعاء 8 اغسطس 2012 مساء .. امام مسجد مصطفى محمود بالمهندسين ..

احمد طه اثناء وقفة للمعتقلين بعد خروجه يوم 8 اغسطس 2012

 

" مكملين طول ما فى الحبس مظاليم " .. كانت تلك اللافتة التى انتقاها الصبى فى تلك الوقفة التضامنية مع المعتقلين امام مسجد مصطفى محمود بالمهندسين فى ذلك المساء .. كانت قدما الصبى قد لمست الاسفلت منذ اسبوعين فحسب .. ولكن قد انمحت آلامه وانكساراته داخل القيد الذى ابتلعته روحه الثائرة منذ الايام الاولى لاعتقاله .. رغم انه فقد تسع شهور كاملة من عمره فى غياهب السجون .. رغم بتر سنتان من دراسته فاصبح اصدقاءه مقبلون على الجامعة وهو مازال بالصف الثانى الثانوى .. رغم انه فوجىء بمدرسته الثانوية تقوم بفصله تماما بناء على اوامر عليا .. الا ان قلب الصبى مازال ينبض روحا وقوة واملا فى غد افضل .. 

وقف الصبى ليعبر عن رايه بكل قوة امام الجميع ويعلن تضامنه الكامل مع اخوته الذين ما يزالون يقبعون فى الزنازين المظلمة .. كان الصبى يشعر من اعماقه بكل هؤلاء المظاليم الذى يتآكلون يوما بعد يوم .. ولما لا وهو كان مثلهم منذ ايام قليلة مجرد " رقم " فى سجلات السجون ومحاضر النيابة .. 

خرج الصبى وهو لا يريد الا استكمال مشوار الكفاح والنضال من اجل حياة افضل لشعب بلده .. لا تعنيه اموره الشخصية او المعيشية .. فقط شيئا واحدا يريده لنفسه .. استرداد حقه المعنوى فى معرفة هوية الجهة التى اعتقلته ونهشت جسده الصغير ودهست 9 اشهر من حياته .. اجتثت من الصبى 9 شهور كاملة عبر تجديدات حبس من النيابة لا تنتهى فلم يمر بنصف احداث الثورة .. لم يشهد الصبى ايا من احداث محمد محمود او مجلس الوزراء او مجلس الشعب او محمد محمود 2 او العباسية 2 ولا يعلم شيئا عن الانتخابات والدستور وغيرها .. بل ان قرار اخلاء سبيله على ذمة التحقيق صدر نتيجة ضغط منظمة الامومة والطفولة العالمية على النائب العام عبر فاكس الى مكتبه وتهديده برفع قضية ضده فى المحكمة الدولية .. كل ما يبتغيه الصبى الان هو استرداد حقه الطبيعى الذى سلب منه ..

ورقة فصل احمد طه من مدرسته الثانوية

عفوا انه ليس صبى صغير بل هو بطل كبير .. بطل كافح وقاوم فى صمت وصمد امام المعتدين من اجل حرية وطنه .. 

انه البطل احمد محمد طه حبيب – اختصارا احمد طه – والشهير بين رفاقه القدامى باسم احمد المصرى ..

ادعموا البطل احمد طه لنيل حقوقه :

حساب احمد طه الشخصى على الفيس بوك

http://www.facebook.com/profile.php?id=100001950946884

حساب احمد طه الشخصى على تويتر

https://twitter.com/ahmed_taha25jan

احمد عاطف

3 سبتمبر 2012

تحليل شخصى لاحداث دهشور بعد زيارتها يوم 4 اغسطس 2012

قمنا بزيارة الى قرية دهشور بالبدرشين محافظة الجيزة بعد احداث العنف بسبب مقتل مسلم على يد مكوجى مسيحى ثم تهجير الاقباط من القرية.. كان فريق الاستطلاع من خمسة : مصطفى ناجح وابانوب واندرو واحمد طه وانا..

هحط تحليل شخصى سريع لاحداث دهشور .. هتكلم عن الحقائق اللى انا صدقتها وشوفتها وسمعتها وحستها.. 

قبل اى حاجة انا شايف ان اللى حصل فى دهشور نموذج مصغر لما يحدث فى مصر بصفة عامة.. 

1 اهالى دهشور الاقباط ليهم جذور داخل القرية من عشرات السنين وليهم امتزاج تجارى واجتماعى داخلها زى اى مكان فى مصر.. 

2 الخناقة وحادثة الوفاة نفسها مش محتاجة تفسير.. خناقة طبيعية تطورت بس المشكلة هنا انها بين مسلم ومسيحى.. وبالنسبة لدهشور بين عيلة وعيلة.. 

3 اشتعل الموقف بشدة بعد وفاة معاذ التلات الصبح.. وادى الى تهجير كامل للاقباط من دهشور .. 47منزل كل واحد به اسرتين او تلاتة.. 120اسرة تقريبا 

4 الاقباط هاجروا على مراحل.. جزء مع سماع خبر وفاة معاذ.. جزء مع تهديدات اهله.. جزء مع تخاذل الشرطة.. جزء اتهربو من المسلمين نفسهم

5 التهجير تم لسبيبين.. تهديد مباشر من اقارب القتيل وهم قطاع عريض بدهشور .. وتخاذل الشرطة بعد ان اجبرتهم على الخروج لعدم القدرة على حمايتهم 

6 التهديدات كانت مباشرة من اهالى معاذ الموتورين ومفيهاش اصابع خفية.. واللى جم من بره وقت الجنازة والتخريب كانو اقاربه من قرى مجاورة

7 الشرطة اعلنت للاقباط عجزها عن حماية الارواح ولكنها قادرة فقط على حماية الممتلكات.. لذلك هرب من تبقى منهم

8 رواية مباشرة من اخو احد الاقباط الذى تم تهجيره بان احد الظباط عنفه وقاله انتو لسه مامشيتوش ليه ياولاد التيت..

9 كبار القرية حاولو تهدئة الموضوع عصرا بعد وفاة معاذ صباحا.. ولكن كان الغضب كبيرا لان القرية كلها اقارب وصلات بمعاذ.. 

10 مساء بعد تهجير الاقباط.. تمت جنازة معاذ بحضور 20 الف من دهشور ومن اقاربه من داخل وخارج القرية.. اتجهو لممتلكات كثير من الاقباط وتم نهبها 

11 من ضمن المحلات المنهوبة ورش ومخازن واجهزة كهربائية وشركة مياة غازية.. واخر الاقباط المتواجدون هناك تم تهريبهم بمعرفة مسلمين 

12 قبل الجنازة انسحب الامن فجاة من القرية ليترك منازل وممتلكات الاقباط بلا ادنى حماية وحمى الكنيسة فقط.. ثم عاد بعد انتهاء الامور 

13 الاقباط المهجرين مش عايزين رجوع لبلدهم فقط.. محتاجين تعويض مادى ومعنوى..محتاجين يحسو بالامان وان دى ارضهم وبلدهم وممتلكاتهم الخاصة

14 نعترف ان عندنا عصبية طائفية وفى مناطق اخرى قبلية وعائلية فى حالة الازمات.. لكن فى الظروف الطبيعية بنبقى سمن على عسل مع بعض..

15 كما فى اى فتنة.. مشكلة بسيطة بتزيد اما لوجود احتقان طائفى شعبى او ايادى استخباراتية.. وبتشتعل مع تعامل الامن المتخاذل او الطائفى 

16 دور الامن ظهر بعد وفاة معاذ.. طالب الاقباط بالهروب ووعدهم بحماية الممتلكات.. هرب قبل الجنازة من دهشور ليترك الاهالى يفرغون غضبهم.. 

*********

اللى بيسال عن حادثة القتل.. فعلا معاذ اتقتل عن طريق الخطا اثناء وجوده بالخناقة ومحاولة فضها وده نفس كلام الطرفين مسلم او مسيحى..

موضوع تخريب الممتلكات..مسلمى دهشور ودونا فى اماكن بعيدة عن اثار التخريب.. لما روحنا قرية الاقباط قالو على اماكن تانية فيها تخريب

اقباط دهشور قالو على اسماء شوارع تفصيليا وبيوت لناس معينة حصلها تخريب ونهب.. واحنا جوه دهشور لقينا مكان به تخريب ومحدش جاب سيرته

موضوع مشاكل طائفية قديمة.. سالنا فيه الطرفين وكانت اغلب اجاباتهم بالنفى التام.. فيه بس اتنين اتكلمو عن ان المكوجى له سوابق مع مسلمين

4 اغسطس 2012